Hindistan Ermənistana ilk "Akaş” raket kompleksini göndərib

Hindistan Ermənistana “Akaş” zenit-raket komplekslərinin ilk kompleksini yola salıb.

Ölkə.Az "New Indian Express"ə istinadən xəbər verir ki, bu barədə "Bharat Electronics Limited" şirkəti öz X (tviter) səhifəsində məlumat yayıb.

"Bu gün "Bharat Electronics Limited" şirkəti Hindistanın müdafiə ixracatında əhəmiyyətli bir addım atıb. Hindistan hökumətinin müdafiə sənayesi üzrə katibi Sanjeev Kumar xarici bir ölkəyə ixrac üçün ilk "Akash" sistemi kompleksini təhvil verilməsi barədə mesaj verib", - şirkətin X sosial şəbəkə hesabında deyilir.

Nəşr xatırladır ki, 2022-ci ildə Ermənistan Hindistanla təxminən 710 milyon dollar dəyərində 15 ədəd “Akaş” raket kompleksinin alınmasına dair müqavilə imzalayıb və bu raket sistemini alan ilk xarici ölkə olub.

Onu da qeyd edək ki, "Bharat Forge" (artilleriya sistemlərinin aparıcı Hindistan istehsalçısı) şirkəti də bu yaxınlarda nümayiş etdirdiyi MArG 155 təkərli özüyeriyən haubitsaların Ermənistan üçün nəzərdə tutulduğunu təsdiqləyib.

Mürtəza
Ölkə.Az