Ekspert: "Bundan sonra Rusiya İŞİD-lə mübarizə adı altında Suriyada istədiyini edəcək"

Artıq Rusiyanın Müdafiə Nazirliyi Suriyada İŞİD-lə mübarizəyə strateji bombardımançı təyyarələri də cəlb edib.

Tu-160, Tu-95MS, Tu-22 ağır bombardımançı təyyarələri dünəndən başlayaraq Suriyada İŞİD mövqelərini bombalayıblar.

Rusiyanın Suriyada apardığı hava əməliyyatlarını hərbi ekspert Üzeyir Cəfərov Ölkə.Az-a şərh edib:

"Rusiyanın İŞİD-lə bağlı münasibəti qeyri-səmimidir. Ona görə ki, İŞİD-lə bağlı bütün dünya bar-bar bağıranda Rusiya gözləmə mövqeyi tutdu. Rusiyanın ümumiyyətlə son illərdə terrorçu qruplaşmalar və terrorçuların dəstəklənməsində özünün dəsti-xətti var. Ermənistanın işğalçılıq siyasətini dəstəkləməsində, o cümlədən separatçılara dəstək verib Krımı işğal etməklə bir daha göstərdi ki, Rusiya heç vaxt səmimi olmayıb. Rusiyanın Suriya məsələsi və İraqdakı hərəkətləri İŞİD-in tam sıradan çıxarılmasına hesablanmayıb.

NATO üzvləri açıq şəkildə bəyan etdilər ki, Rusiyanın İŞİD-ə qarşı apardığı mübarizədən mülki şəxslər və infrastruktur ziyan görür. Ona görə də, onlar Rusiyanı bu addımlardan çəkindirməyə çağırırlar. Rusiya İŞİD-ə qarşı strateji bombardımançılardan istifadə etməyə başlayıb. Bundan sonra İŞİD-lə mübarizə adı altında Kreml Suriyada istədiyini edəcək. Sabah təəcüblənmərəm ki, Əsəd rejiminə qarşı döyüşən qüvəlləri də bombalaya bilər. Bu Rusiya üçün adi bir haldır. Rusiya bir növ özünün dünyada hegemonluğunu sübut etmək istəyir. Ancaq dünyanın aparıcı dövlətləri bunu qəbul etmir".

Qeyd edək ki, Rusiya sentyabr ayının 30-dan Suriyada hava əməliyyatları keçirir.

Səxavət Məmməd
Ölkə.Az