Azərbaycan YUNESKO Ümumdünya İrs Komitəsinə üzv seçilib

Ümumdünya mədəni və təbii irsin qorunması üzrə Konvensiyaya üzv dövlətlərin 20-ci Baş Assambleyası YUNESKO-nun 38-ci Baş Konfransı çərçivəsində noyabrın 18-dən 20-dək təşkilatın mənzil qərargahında keçirilib.

Ölkə.az-ın məlumatına görə, Baş Assambleyanın 18 noyabr iclasında Ümumdünya İrs Komitəsinə seçkilər baş tutub və Azərbaycan bu Komitəyə üzv seçilib. Komitə Ümumdünya mədəni və təbii irsin qorunması üzrə Konvensiyaya uyğun olaraq fəaliyyət aparır və, o, Ümumdünya İrs Siyahısına əlavələr ediləndə yekun və qərarverici səsə malikdir. Həmçinin Komitə Ümumdünya İrs Fondunun istifadəsini müəyyənləşdirir, Ümumdünya İrs Siyahısına artıq əlavə olunmuş irs nümunələrinin konservasiyasına nəzarət edir. Həmçinin təhlükə altında olan irs siyahısına əlavələr etməyə qərar verir.

Qeyd edəək ki, Azərbaycan tərəfi Ümumdünya İrs Komitəsinə seçki kampaniyası çərçivəsində oktyabrın 15-də Parisdə, YUNESKO-nun mənzil qərargahında Azərbaycan mədəni irsinin təqdimatını və ziyafət təşkil edib.

Ölkə.az