Vaqif Əliyev Azərbaycanı Türkmənistanda təmsil edəcək

Mədəniyyət və Turizm Nazirliyi TÜRKSOY mədəniyyət nazirləri Daimi Şurasının 33-cü toplantısında təmsil olunacaq.

Ölkə.az-ın məlumatına görə, 26-28 noyabr tarixində Türkmənistanın Marı şəhərində TÜRKSOY mədəniyyət nazirləri Daimi Şurasının növbəti 33-cü toplantısı keçiriləcək. Toplantıda ölkəmizi mədəniyyət və turizm nazirinin birinci müavini Vaqif Əliyevin rəhbərlik etdiyi nümayəndə heyəti təmsil edəcək. Toplantı çərçivəsində ötən il həyata keçirilmiş layihələrə dair TÜRKSOY Baş katibinin hesabatının dinlənilməsi, 2016-cı il üçün tədbirlər planının təsdiqi, 2016-cı il üçün "Türk dünyasının mədəniyyət paytaxtı" elan ediləcək şəhərin müəyyənləşdirilməsi və başqa məsələlərə dair qərarların qəbul edilməsi nəzərdə tutulur.

Tədbir çərçivəsində nümayəndə heyətlərinin Türkmənistanın Marı şəhərinin 2015-ci il üçün türk dünyasının mədəniyyət paytaxtı elan olunması və Türkmənistanın daimi bitərəflik statusunun əldə etməsinin 20 illiyi münasibətilə 27-28 noyabr 2015-ci il tarixində Marı şəhərində keçiriləcək mədəniyyət ilinin bağlanış mərasimində iştirakı, eləcə də Türkmənistan Prezidenti tərəfindən qəbulu da nəzərdə tutulur.

Qeyd edək ki, tədbirin mədəni hissəsində təşkil olunacaq türkdilli ölkələrin mədəniyyət və incəsənət xadimlərinin konsert proqramında Azərbaycandan muğam qrupu iştirak edəcəkdir.

Ölkə.az