Muaremlə bağlı "Qarabağ" klubundan

Türkiyə mətbuatında yayılan xəbərlərə görə, "Əskişəhərspor" da Teofanis Gekasdan sonra Muarem Muaremdə klubdan ayrıla bilər.

Muarem Muaremin komandadan ayrılıq xəbərləri futbolçunun yenidən "Qarabağ"a qayıtmasını gündəmə gətirib. Makedoniyalı yarımmüdafiəçi bir müddət əvvəl müsahibəsində klubdan təklif gəldiyi halda qayıda biləcəyini vurğulamışdı.

Həmçinin Klubun vitse-prezidenti Tahir Gözəlin "Seltik"lə oyun sonrası açıqlamasında komandanın qapılarının Muarem Muaremin üzünə açıq olduğunu qeyd etmişdi. Bu açıqlamaların indiki durumda futbolçunun "köhlən atlılar"ın heyətinə yenidən qayıdacağı şübhələrini artırıb.

Ölkə.Az məsələylə bağlı "Qarabağ" klubunun mətbuat katibi Nurlan İbrahimovla əlaqə saxlayıb.

Klub rəsmisi bildirib ki, "Avqust ayında baş tutan "Seltik"lə görüşdən sonra bu açıqlama olub. Artıq o vaxtdan 5 ay keçib. Sadəcə Tahir müəllim Leroy və Muaremin çox dəyərli futbolçu olduğunu, eyni zamanda "Qarabağ"da oynayan hər hansı bir futbolçunun ailənin bir üzvü olduğunu vurğulayıb. Hal-hazırda Muarem başqa komandanın futbolçusudur və klubla 2 illik müqaviləsi var. Bu barədə indi danışmaq futbol əxlaqı baxımından da düzgün deyil."

Qeyd edək ki, Muarem 2012-2015-ci illərdə "Qarabağ"ın formasını geyinib.

Taleh Rəcəb
Ölkə.Az