Nepalda nəqliyyat üzrə regional forum keçirildi
Noyabrın 17-dən 20-dək Nepalın Katmandu şəhərində BMT Asiya sakit Okeanı üzrə İqtisadi və Sosial Komissiyanın təşkilatçılığı ilə Ətraf mühit baxımından Davamlı Nəqliyyat Forumu və bu çərçivədə təşkil edilən iqlim dəyişikliyinə uyğunlaşan və dayanıqlı nəqliyyat üzrə regional forum keçirilib.
Bu barədə Nəqliyyat Nazirliyindən Ölkə.Az-a bildirilib.
Forumda nəqliyyat sahəsində ekoloji baxımdan dayanıqlı inkişafı təmin etmək məqsədilə müvafiq tədbirlərin həyata keçirilməsinin zəruriliyi müzakirə olunub. Müzakirələrdə avtomobil nəqliyyatının ətraf mühitə zərərli təsirinin səviyyəsini tənzimləyən normativ hüquqi aktların qəbul edilməsi, nəqliyyat sahəsində ekoloji yönümlü harmonik siyasətin həyata keçirilməsi üçün nəqliyyat sektorunda qanunvericilik sisteminin təkmilləşdirilməsi məsələləri müzakirə edilib.
Bundan başqa, avtomobil nəqliyyatında istifadə edilmək üçün ekoloji baxımdan təmiz yanacaq növlərinə keçilməsi (sıxılmış maye qaz, bioqaz və s.), avtomobil və dəmir yollarının müasir dünya standartlarına müvafiq rekonstruksiya olunması, şəhər daxilində avtonəqliyyat vasitələrinin sıxlığının azaldılması və tıxacların qarşısının alınması məqsədilə yaşayış məntəqələrinin ətrafında dairəvi avtomagistral yolların çəkilişinə üstünlük verilməsi və s. məsələlər ətrafında fikir mübadiləsi aparılıb.
Qeyd edək ki, tədbirdə Nəqliyyat Nazirliyinin nümayəndələri də iştirak edib.
Ölkə.Az
