Politoloq: "İŞİD məhv edilmək üzrədir"

Rusiya və NATO qüvvələri durmadan İŞİD-i bombalayır. Xarici mediada isə belə bir xəbər yayılıb ki, İŞİD-ə qarşı keçirilən əməliyyatlar gözlənilən effekti vermir. İŞİD güclənməkdə davam edir.

İŞİD-ə qarşı keçirilən əməliyyatlar və İŞİD-in hal-hazırdakı vəziyyətini politoloq Qabil Hüseynli Ölkə.Az-a şərh edib:

"Baş verənlərin İŞİD-ə təsir etmədiyini demək hadisələrin çarpıdılması və təhrif edilməsidir. İŞİD-in içərisində dağılma prosesi gedir. Dağılma prosesi özünü onda göstərir ki, İŞİD-in sıralarından qaçmaq istəyənlərin sayı çoxalıb. O adamların bir neçəsini qadın paltarında qaçarkən tutublar. İŞİD-in artıq maliyyə qaynaqları da tükənmək üzrədir. Artıq İŞİD hər tərəfdən mühasirədədir. İŞİD-in əlində olan əsas maliyyə mənbəyi, neftlə zəngin torpaqlar da kürd peşmərgələri tərəfindən ələ keçirilib.

İŞİD-ə yeni adamların qatılması prosesi də demək olar ki, dayandırılıb. Artıq Türkiyə sərhədləri tamamilə qorunur. Suriya dövəti ilə Suriya Azadlıq Ordusu arasında atəşkəs elan olunub. Atəşkəsə qismən də olsa əməl edilir. Nəticə etibarı ilə Suriya Azadlıq Ordusunun bir hissəsi də İŞİD-ə qarşı döyüşür. ABŞ bundan əvvəl İraqa 2 000 dəniz piyadası göndərmişdi, daha 1 000 dəniz piyadasının göndərilməsi haqqında qərar qəbul edilib. Həmin dəniz piyadaları İraq ordusunun yenidən qurulmasına kömək edəcək. Son zamanlar İraq ordusu ciddi uğurlar qazanıb. Bir neçə vilayəti İŞİD-in işğalından azad edib. Kürd peşmərgələri də kifayət qədər fəaldır. Onların da sıralarında 7 minə qədər döyüşçü var. Türkiyə İraqda və Suriyada yaşayan türkmənlərdən (əslində onlar azərbaycanlıdırlar) ibarət 5 000-ə yaxın döyüşçü hazırlayıb. Həmin döyüşçülər də, Kərkük və Suriyanın onlara aid olan ərazilərinin yarısına qədərini işğaldan azad edib.

Türkiyənin İncirlikdəki hərbi bazasına yeni qırıcılar gətirilib. Bu qırıcılar F-16-dan ciddi surətdə fərqlənir. Fransa da döyüş əməliyyatlarını genişləndirib. Britaniya parlamentin etirazına baxmayaraq təyyarələrini və təyyarə daşıyan gəmilərini Aralıq dənizinə yola salıb. Rusiya da son zamanlar İŞİD-ə qarşı çox fəal surətdə əməliyyatlara qoşulub. İŞİD məhv edilmək üzrədir. İŞİD artıq İslamın adı ilə cinayətlər törədə bilməyəcək".

Səxavət Məmməd
Ölkə.Az