Ölümə təslim olacağı günü gözləyən ailə

İntiqam VALEHOĞLU

İş yoldaşım Səxavət dindən uzaq adamdır, ibadət əhli deyil, el diliylə desək, yeyib-içən oğlandır. Ən çox xoşladığı da "İce tea"dır. Nə vaxt baxırsan ondan içir. Amma dünən elə bir "ibadət" edib ki, yəqin bu addımı uzun illər həm Məhərrəmovlar ailəsinin, həm də xeyirxah insanların yaddaşında qalacaq. Çox güman ki, özünün də...

Bilməyənlər üçün qısaca xatırlatma. Namiq Məhərrəmov, həyat yoldaşı və dörd uşağı ilə "Azerenerji"nin yataqxanasına sığınıb. Sığınıb deyəndə ki, ayda 150 manat kirayə haqqı ödəyir və son dörd ayı kirayəni ödəməyə çətinlik çəkir.

Altı nəfərlik ailənin sonbeşikləri cəmi bir aylıqdır və hər ikisinin fiziki qüsuru var. Ailə uşaqlarının həkimə aparmağa pul tapa bilmir. Namiqin adına Şəkidə 70 sot torpaq olduğundan ona ünvanlı sosial yardım verən də yoxdur. Özü isə üçüncü qrup əlildir. Deyir yenicə əməliyyat olunub və ağır işlərdə işlədiyinə görə əməliyyatın yeri "açılıb". İndi heç o iş də yoxdur. Ailə birotaqlı mənzildə acından ölümə təslim olacağı günü gözləyir. Bütün bunlar Səxavətin yazdığı, Nurlanın çəkdikləri idi.

...Tez-tez sosial şəbəkələrdə, saytlarda, elə real ünsiyyətimizdə özümüzü, cəmiyyətimizi tənqid edirik, bəzən hətta təhqirə də yol verənlər olur. Guya Avropada hər gün səhər tezdən çörəyin üstünə yağ yaxıb bir stəkan şirin çayla camaata paylayırmışlar. Guya orada camaatın əlindən kitab yerə düşmür. Ay nə bilim azad seks var, kim kiminlə istəyirsə sevgili olur, sevişir və sair. Amma bu zalım uşağı nətəhər sevişirlərsə, ildən-ilə azala-azala gedirlər. Maya batırmağa bir candır köpək qızları. Avropalı gəlinləri deyirəm. Küçədə yıxılıb can verəsən, bir adam yaxın durmaz. Özüm olmamışam, amma eşitdiyimdən, oxuduğumdan bilirəm ki, vəziyyət dediyimdən artıq deyil.

...Yazı saytda dərc olunandan ailəyə kömək etmək istəyənlərin ardı-arası kəsilmir. Onların arasında dünya çempionları da var, tanınmış şəxslər də, güzəranı Məhərrəmovlardan azacıq fərqlənən sıravi vətəndaşlar da. Hiss edirsən ki, kömək etmək istəyənlər bunu göstəri üçün etmirlər.
Çox tanınmış idmançılarımızdan birini (dünya çempionudur) nə illah elədimsə, adının çəkilməsinə icazə vermədi və dediyi bu oldu:

"Mən bunu publika üçün etmirəm".

Elə tanınmış rejissorlarımızdan biri də eyni xahişdə bulundu. Hələ sıravi vətəndaşları demirəm. Deməli, yeri gələndə biz nəinki avropalılardan, dünyanın istənilən xalqından mərhəmətliyik. Deməli, istəyəndə birləşməyi də bacarırıq, səxavətli olmağı da.

 

P.S. İnanıram ki, bu yazıdan sonra məsələdən xəbəri olmayan digər mərhəmətli insanlar da Məhərrəmovlar ailəsinə kömək edəcəklər.

Ölkə.az