Səs yazısı yayıldı, direktor cəzalandırıldı
Təhsil müəssisələrində valideynlərin əlavə tədris materialları almasına təşviq edilməsi, eləcə də müxtəlif sınaq imtahanları üçün məcburi şəkildə hər hansı vəsaitin toplanılması yolverilməzdir.
Bu barədə Ölkə.Az-a Gəncə-Daşkəsən Regional Təhsil İdarəsindən məlumat verilib. Bildiririlib ki, Gəncə şəhəri İsmət Qayıbov adına 1 nömrəli tam orta məktəbin fəaliyyəti ilə bağlı yayılan səsyazısı ilə əlaqədar olaraq Gəncə-Daşkəsən Regional Təhsil İdarəsi tərəfindən araşdırma aparılıb. Araşdırma nəticəsində ümumi təhsil müəssisəsinin fəaliyyətində bir sıra nöqsanlar aşkar edilib. Regional Təhsil İdarəsinin müvafiq əmrinə əsasən adıçəkilən təhsil müəssisəsinin direktoruna sonuncu xəbərdarlıqla şiddətli töhmət verilib.
Qeyd edirik ki, tədris prosesinin keyfiyyətinin artırılması və müəssisələrin fəaliyyətində şəffaflığın təmin edilməsi məqsədilə təhsil müəssisələrində sistemli və ardıcıl şəkildə yoxlama-nəzarət tədbirləri həyata keçirilir.
Xatırladaq ki, bundan əvvəl sözügedən məktəblə bağlı səs yazısı yayılıb. Valideynlərdən biri şagirdlərdən fond pulu, təmizlik pulu, summativ pulu, xadimə pulu və sair yığıldığını iddia edib. Eyni zamanda valideyn bildirib ki, Təhsil idarəsinin adından övladının çantasına məcburi şəkildə yeddi manatlıq sınaq bileti qoyulub.
Ölkə.Az
