Həftənin icmalı
Azərbaycanda iki nazirliyin 30 əməkdaşı vəzifədən azad olundu
16.11.2015
Bu ilin ötən dövrü ərzində Ekologiya və Təbii Sərvətlər Nazirliyi və Gənclər və İdman Nazirliyinin 30 əməkdaşı yaş həddinə görə vəzifədən azad olunub.
Ölkə.Az xəbər verir ki, bu barədə "Report"un sorğusuna cavab olaraq adıçəkilən nazirliklərin ictimaiyyətlə əlaqələr şöbəsindən məlumat verilib.
Ekologiya və Təbii Sərvətlər Nazirliyin mətbuat xidmətindən bildirilib ki, nazirlikdə əmək qanunvericiliyinin tələblərinə ciddi formada əməl edilir:
"Əmək Məcəlləsinə əsasən, dövlət büdcəsindən maliyyələşən müəssisələrdə çalışmanın yaş həddi 65-dir. Bu ilin ötən dövrü ərzində Ekologiya və Təbii Sərvətlər Nazirliyinin 27 əməkdaşı yaş senzinə görə işdən azad olunub".
Ordumuz beynəlxalq tədbirdə iştirak edəcək
16.11.2015
Azərbaycan Silahlı Qüvvələrinin nümayəndələri beynəlxalq tədbirdə iştirak edəcəklər.
Müdafiə Nazirliyinin mətbuat xidmətindən verilən məlumata görə, noyabrın 17-dən 19-dək Ramşteyn şəhərində (Almaniya Federativ Respublikası) "NATO-da hərbi tərəfdaşlıq fəaliyyətlərinin koordinasiyası prosesi" mövzusunda işçi görüşü keçiriləcək.
Tədbirdə Azərbaycan Silahlı Qüvvələrinin nümayəndələri iştirak edəcəklər.
Azərbaycanda internet kəsildi
16.11.2015
Son bir neçə gündə Azərbaycanda internet istifadəçilərinə verilən internetin sürəti kəskin şəkildə aşağı düşüb.
Ölkə.az xəbər verir ki, bu gün isə səhərdən başlayaraq demək olar ki, Azərbaycandakı bütün provayderlərin müştərilərinə verdiyi internetin sürəti sıfır həddinə enib.
Məlumata görə hələlik ölkə ərazisində "Ultel" və "Bakcell" şirkətlərindən internet alan müştərilər qlobal şəbəkəyə qoşula bilirlər. Geridə qalan bütün provayderlərin müştəriləri isə internetə qoşula bilmirlər.
Azərbaycanda internetin fəaliyyəti bərpa olundu
16.11.2015
Bir neçə dəqiqə əvvəl Azərbaycanda internetin fəaliyyəti bərpa olunub.
Qeyd edək ki, bütün ölkə ərazisində internet təxminən saat 16:05-16:10 radələrində kəsilib.
Altı saatlıq təmir işlərindən sonra respublikada internetin fəaliyyətini bərpa etmək mümkün olub.
Hadisəyə ölkədə əsas internet paylayıcısı olan Delta Telecom şirkətinin inzibati binalarından birində baş verən yanğın səbəb olub.
“Aztelekom”da saxlanılanların sayı artdı
17.11.2015
Bundan əvvəl Baş Prokurorluğun mətbuat xidmətindən Trend-ə verilən məlumata görə, iş üzrə Beytulla Hüseynov, Anar Mustafayev, Emin Məmmədov, Bayram Vəliyevə və “Aztelekom” MMC-nin baş mühasibi Oktay Rüstəmova Cinayət Məcəlləsinin 179.3.2 (külli miqdarda mənimsəmə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı), Vidadi Zeynalova, həmçinin “AzİnTelekom” MMC-nin baş direktoru Cəlil Cəfərova, “Azərpoçt” MMC-nin baş direktoru Qəmbər Bəybalayevə və “Optik Rabitə, Tikinti və Quraşdırma” MMC-nin direktoru Namazalı Məmmədova həmin məcəllənin 179.3.2 və 308.2-ci, MMC-nin baş mühasibi Səhrab Hümbətova isə 179.3.2, 308.2 və 313-cü maddələrdə nəzərdə tutulan ittiham elan edilməklə barələrində məhkəmənin müvafiq qərarları ilə həbs qətimkan tədbiri seçilib.
Çovdarovun kürəkəni də MTN-dən qovuldu
17.11.2015
Əmircanova məxsus 1 milyon dollarlıq villa möhürlənib.
MTN-in Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov həbs edildikdən sonra, onun ikinci kürəkəni, əslən Borçalının Qaçağan kəndindən olan, MTN şöbə rəisi, polkovnik-leytenant, Rəşad Əmircan oğlu Əmircanov, Milli Təhlükəsizlik Nazirinin 1-ci müavini, nazir səlahiyyətərini icra edən Mədət Quliyevin əmri ilə vəzifəsindən kənarlaşdırılıb və sərəncama göndərilib.
Eldar Mahmudovun həyat yoldaşı işə çıxmır
17.11.2015
Azərbaycan Həmkarlar İttifaqları Konfederasiyasının (AHİK) katibi Tahirə Mahmudova səhhəti ilə əlaqədar işə çıxmır.
Ölkə.Az xəbər verir ki, bu barədə “Report”a AHİK-in Mətbuat və ictimaiyyətlə əlaqələr şöbəsinin müdiri Nazim Ağamirov bildirib.
“O, hazırda məzuniyyətdədir”, - AHİK sözçüsü əlavə edib.
Qeyd edək ki, Tahirə Mahmudova sabiq milli təhlükəsizlik naziri Eldar Mahmudovun həyat yoldaşıdır.
Azərbaycanın güllələnmiş keçmiş nazirinin həyat yoldaşı vəfat etdi
17.11.2015
Azərbaycanın kabinetində güllələnərək qətlə yetirilən keçmiş daxili işlər naziri general-leytenant Arif Heydərovun həyat yoldaşı Ədilə Heydərova dünyasını dəyişib.
Ölkə.Az "Report"-a istinadən xəbər verir ki, Ə.Heydərova 80 yaşında vəfat edib.
O, 30 ilə yaxın Azərbaycan Təhsil İşçiləri Azad Həmkarlar İttifaqının sədri işləyib. Yaşla əlaqədar 2006-cı ildə vəzifəsindən uzaqlaşıb.
Bakının ən təhlükəli sürüşmə ocaqları müəyyənləşdi
17.11.2015
Azərbaycan Milli Elmlər Akademiyasının (AMEA) Coğrafiya İnstitutu tərəfindən ilk dəfə olaraq Böyük Bakı ərazisində təhlükəli geomorfodinamiki proseslərin inkişafının qiymətləndirilməsi aparılıb və bunun nəticəsində təhlükəli sürüşmə ocaqları müəyyənləşdirilib.
İnstitutun Landşaftşünaslıq və landşaft planlaşdırılması şöbəsinin aparıcı elmi işçisi, coğrafiya üzrə elmlər doktoru Starə Tarixəzəri Trend-ə deyib ki, ilkin nəticələrə görə, Bakıda Dağüstü park, Bayıl yamacı, Gəncə prospekti, Yeni Günəşli yaşayış massivi, köhnə kərpic zavodunun ərazisi və Masazır qəsəbəsində sürüşmə sahələri geniş yayılıb və həmin ərazilər sürüşmə baxımından təhlükəli hesab edilir.
Azərbaycanda WhatsApp-ın zəng xidməti bərpa edildi
17.11.2015
Azərbaycanda da kifayət qədər populyar olan WhatsApp tətbiqinin zəng funksiyasına qoyulan qeyri-rəsmi qadağa qismən aradan qaldırılıb.
Ölkə.Az xəbər verir ki, hazırda mobil internet vasitəsilə bu funksiya ilə zənglər mümkün olmasa da, Wi-Fi texnologiya ilə WhatsApp-dan zənglər etmək mümkündür.
Sınaqdan keçirdiyimiz provayderlərlə, Alfanet, Azeronline, Bakinternet, Citynet, Ultel-də bu funksiya ilə zəng etmək artıq mümkündür.
Bakıda 20 min manata Quran satılır
17.11.2015
Azərbaycanda ən böyük pulsuz elanlar saytı olan Tap.Az-da qədim Quran kitabı satışa çıxarılıb.
Oxu.Az xəbər verir ki, elanı saytda yerləşdirən şəxs Quranın 1837-ci ildə yazıldığını qeyd edib.
Bildirilir ki, müqəddəs kitab ona babalarından yadigar qalıb.
Ekspertlər həmin kitabın qədim olduğunu təsdiqləyiblər.
İlkin olaraq 20 min manat qiymət göstərən şəxs sövdələşmə zamanı qiymətdə razılaşmanın mümkün olduğunu da vurğulayıb.
Ölkədə yenidən internet problemi yarandı
17.11.2015
Bu saatlarda Azərbaycanda internetlə bağlı yenidən problemlər yaranıb.
Hazırda internet verilməsi bərpa edilsə də bir çox resurslara, o cümlədən böyük sosial şəbəkələrə qoşulmada problemlər var.
Xatırladırıq ki, bir neçə saat bundan əvvəl Rabitə və Yüksək Texnologiyalar Nazirliyi internetlə bağlı yaranmış problemlərə aydınlıq gətirərək şəbəkədəki nasazlıqların aradan qaldırılacağını açıqlamışdı.
Prokuror Aytacın qatilinə cəza istədi
17.11.2015
Bakı Ağır Cinayətlər Məhkəməsində Gürcüstan vətəndaşı, 1995-ci il təvəllüdlü İzzət Hüseynovun CM-nin 120.2.4-cü (xüsusi amansızlıqla qəsdən adam öldürmə) maddəsi ilə təqsirləndirilməsinə dair cinayət işi üzrə məhkəmə prosesi davam edib.
Oxu.Az xəbər verir ki, məhkəmə prosesində zərərçəkmişin hüquqi varisi, mərhumun anası İ.Hüseynova ömürlük cəza verilməsini xahiş edib, onun ardınca çıxış edən dövlət ittihamçısı isə təqsirləndirilən şəxsin 20 il müddətinə azadlıqdan məhrum edilməsini istəyib.
Azərbaycanda nikahların sayı azaldı — RƏSMİ
17.11.2015
Bu ilin oktyabr ayının 1-i vəziyyətinə Azərbaycanda qeydiyyat şöbələri tərəfindən 51 min nikah və 9,6 min boşanma halları qeydə alınıb.
Dövlət Statistika Komitəsindən Ölkə.Az-a verilən məlumata görə, ötən ilin müvafiq dövrü ilə müqayisədə əhalinin hər 1 000 nəfərinə nikahların sayı 8,9-dan 7,1-ə qədər azalıb, boşanmaların sayı isə eyni səviyyədə (1,3) qalıb.
Dövlət Miqrasiya Xidmətinin və Daxili İşlər Nazirliyinin müvafiq qurumları tərəfindən cari ilin yanvar-sentyabr ayları ərzində Azərbaycana daimi yaşamaq üçün 2 038 nəfər gələn və 820 nəfər ölkədən gedən qeydə alınıb.
Daha bir vəzifəli məmur həbs edildi
18.11.2015
"Bakı Telefon Rabitəsi" İstehsalat Birliyinin daha bir vəzifəli şəxsi həbs edilib.
"Bakı Telefon Rabitəsi" İstehsalat Birliyinin Nizami telefon qovşağının baş mühasibi Rəşad Məmmədov barəsində Binəqədi rayon Məhkəməsinin qərarı ilə 3 ay müddətinə həbs qətimkan tədbiri seçilib.
Xatırladaq ki, dünən "Bakı Telefon Rabitəsi" İstehsalat Birliyinin Nizami telefon qovşağının rəisi Fətullah Seyidov barəsində də 3 ay müddətinə həbs qətimkan tədbiri seçilib.
Azərbaycan Rusiyanın An-124 təyyarəsini hava məkanına buraxmadı
18.11.2015
Noyabrın 15-də Rusiyanın Hərbi kosmik qüvvələrinin An-124 “Ruslan” ağır nəqliyyat təyyarəsi Ermənistanın Gümrü aerodromundan havaya qalxıb, çox güman ki, o, Rusiyaya uçurdu.
Amma təyyarə havaya qalxdıqdan bir müddət sonra geri dönməli olub, belə ki, Azərbaycan təyyarəyə öz hava məkanına daxil olmağı qadağan edib, voskanapat.info məlumat yayıb.
Bu barədə məlumat aviasiya bloqu mil_avia-da yerləşdirilib.
Bloqun dərc etdiyi materiala təyyarənin pilotunun Gümrü aeroportunun dispetçeri ilə radio-danışığının yazısı da əlavə edilib.
“Aztelekom”un rəhbəri YAP-dakı vəzifəsindən qovuldu
18.11.2015
Məhəmməd Məmmədov Yeni Azərbaycan Partiyası Mərkəzi Nəzarət - Təftiş Komissiyasının sədri vəzifəsindən öz ərizəsi ilə azad olunub.
Ölkə.Az partiyanın saytına istinadən xəbər verir ki, Baş prokuror yanında Korrupsiyaya qarşı Mübarizə Baş İdarəsi tərəfindən «Aztelekom» İstehsalat Birliyinin baş direktoru Məhəmməd Məmmədovun barəsində həbs qətimkan tədbiri seçilib.
Yeni Azərbaycan Partiyası Mərkəzi Nəzarət - Təftiş Komissiyasının sədri olmuş Məhəmməd Məmmədov sözügedən yoxlamaların və istintaqın başlaması ilə əlaqədar YAP strukturlarında tutduğu vəzifədən azad olunmaq barədə ərizə ilə müraciət edib.
Gülər Əhmədova BDU-dan çıxarıldı
18.11.2015
Keçmiş deputat, psixologiya elmləri üzrə fəlsəfə doktoru Gülər Əhmədova Bakı Dövlət Universitetinin (BDU) müəllimi vəzifəsindən azad olunub.
Ölkə.Az "Report"a istinadən xəbər verir ki, G.Əhmədovanın dərs dediyi BDU-nun Sosial elmlər və psixologiya fakültəsində 2015-2016-cı tədris ilində ona dərs saatı verilməyib. Ona görə də keçmiş deputat işdən çıxmaqla bağlı ərizə yazıb. BDU rəhbərliyi G.Əhmədovanın ərizəsini qəbul edib və onun universitetin müəllimi vəzifəsindən azad olunmasına qərar verilib.
Azərbaycanda hədiyyələrdən vergi tutulacaq
18.11.2015
Azərbaycan Respublikasının Vergilər Məcəlləsində fiziki şəxslərə verilən hədiyyə və mirasların vergiyə cəlb olunması beynəlxalq qanunvericilikdə xüsusi normalarla müəyyənləşdirilib.
Ölkə.Az xəbər verir ki, baku.ws-in məlumatına görə, bu barədə Vergilər Nazirliyinin Vergi siyasəti və strateji araşdırmalar Baş İdarəsinin şöbə rəisi Şükür Əhmədov bildirib. Onun sözlərinə görə, fiziki şəxslərə hədiyyənin kim tərəfindən verilməsindən, qohumluq əlaqələrinin olub-olmamasından asılı olaraq, Vergi Məcəlləsində hədiyyə və mirasların vergiyə cəlb olunması məsələsinə xüsusi yanaşma var.
Qanuna görə, işəgötürənin öz işçisinə malı, işi, yaxud xidməti hədiyyə etdiyi halda, bunlar bazar qiymətilə dəyəri fiziki şəxsin gəliri hesab olunur. Bu zaman hədiyyələrin dəyəri 1000 manatdan çox, mirasların dəyəri isə 20 min manatdan çox olarsa, o zaman ondan vergi tutulur.
Bakının mərkəzi yollarında avtomobillərin orta sürəti açıqlandı
18.11.2015
Bakının mərkəzi küçə və prospektlərində ötən ay ərzində nəqliyyat vasitələrinin gündəlik orta sürət göstəriciləri haqqında ictimaiyyətə məlumat verilib.
Nəqliyyat Nazirliyi Nəqliyyatı İntellektual İdarəetmə Mərkəzindən Ölkə.Az-a verilən məlumata görə, ötən ay nəqliyyat vasitələrinin gündəlik orta sürət göstəriciləri aşağıdakı kimi olub:
1. 28 May küçəsi - 42.6 km/saat
2. Zərifə Əliyeva küçəsi - 43 km/saat
3. Üzeyir Hacıbəyli küçəsi - 43 km/saat
4. Rəşid Behbudov küçəsi – 39,3 km/saat
5. Bülbül prospekti – 36,9 km/saat
6. Azərbaycan prospekti - 35 km/saat
Könüllü təslim olmuş erməni əsgər geri qaytarıldı
18.11.2015
Təmas xəttini 22 mart 2015-ci il tarixdə keçən erməni əsgər bu gün Beynəlxalq Qızıl Xaç Komitəsinin (BQXK) himayəsi altında keçirilən əməliyyat zamanı geri qaytarılıb.
BAXK-nın Azərbaycan nümayəndəliyindən APA-ya verilən məlumata görə, təhvilvermə Azərbaycanın Ağdam rayonunun Baş Qərvənd kəndi yaxınlıgıinda baş verib.
BQXK saxlandığı dövr ərzində bu şəxsə mütəmadi olaraq baş çəkərək onun saxlanma şəraitini və onunla necə davranıldığını qiymətləndirib və ailəsi ilə əlaqə yaradılmasında yardimçı olub.
Parlament seçkilərinə yekun vuruldu
18.11.2015
Mərkəzi Seçki Komissiyası (MSK) noyabrın 1-də V çağırış Milli Məclisə keçirilmiş seçkilərlə əlaqədar səsvermənin ümumi yekunlarına dair protokolun təsdiqi və seçkilərin yekunlarının təsdiq edilməsi üçün Konstitusiya Məhkəməsinə təqdim olunması barədə qərar qəbul edib.
Oxu.Az-ın APA-ya istinadən verdiyi xəbərə görə, MSK-nın bu gün keçirilən iclasında MSK sədri Məzahir Pənahov deyib ki, Seçki Məcəlləsinə əsasən, səsvermə günündən ən geci 20 gün keçənədək MSK seçkilərin nəticələrinin yoxlanılması və yekun vurulması prosesini başa çatdırmalıdır.
Bu proses bu gün başa çatıb. Ötən müddət ərzində MSK daxil olan şikayətləri araşdırıb və qərarlar qəbul edib. 90 saylı Ağdaş Seçki Dairəsi istisna olmaqla, MSK Milli Məclisə keçirilmiş seçkilərlə əlaqədar dairələrdə seçkinin nəticələrinə ciddi təsir edən pozuntular aşkarlamayıb, şikayətlərlə əlaqədar seçkinin ilkin nəticələrinə əsasən müəyyənləşən lider namizədlərin statusunu dəyişdirəcək qərarlar verilməyib. MSK yalnız noyabrın 17-də 90 saylı Ağdaş Seçki Dairəsində 40 seçki məntəqəsindən 17-də seçkinin nəticələrini etibarsız sayıb və bu dairədə seçkinin nəticələrinin etibarsız sayılması barədə qərar verib.
Yalan xəbər yayan saytların adları açıqlanacaq
19.11.2015
“Yalan və böhtan xarakterli məlumat yayan internet KİV-lərin adı cəmiyyətə açıqlanacaq. Həmin hallarla bağlı qanunvericilik çərçivəsində ölçü götürüləcək”.
Ölkə.Az xəbər verir ki, bunu AzVision.az-aaçıqlamasında Mətbuat Şurasının sədri Əflatun Amaşov deyib.
MŞ sədri bildirib ki, son günlər mətbuatda dərc olunan yalan və böhtan xarakterli məlumatlarla bağlı iclas keçiriləcək.
“Mətbuat Şurasının həmin hadisələrlə bağlı missiyası monitorinq aparmaq və nöqsana yol verən jurnalistlərə tövsiyə verməkdir. Mətbuat Şurasının İdarət Heyətinin üzvləri ilə məsəhətləşmə aparırırq. Yaxın günlərdə bununla bağlı tədbir keçiriləcək və orada bu məsələləri müzakirə edəcəyik”.
Hər il qripdən 2 milyon insan ölür
19.11.2015
Hər il 2 milyon insan qripdən və onun fəsadlarından ölür.
Ümumdünya Səhiyyə Təşkilatının məlumatlarına əsasən dünyada hər il 500 milyon insan qripp xəstəliyinə tutulur və hər il 2 milyon insan qripdən və onun fəsadlarından ölür.
Ölənlərin 80%-i uşaqlar, yaşlı insanlar, xroniki xəstəlikləri olan insanlar təşkil edir. Beləliklə, qripp "yüngül" xəstəlik deyil, qripi "ayaq üstə" keçirmək olmaz.
Azərbaycan daha bir iş adamını axtarışa verdi
19.11.2015
Azərbaycanda vergidən yayınan daha bir iş adamı beynəlxalq axtarışa verilib.
Bu barədə İnterpolun saytında məlumat yerləşdirilib. Məlumatda qeyd olunur ki, 54 yaşlı Qalib İbrahimov külli miqdarda vergi ödəməkdən yayınmaqda təqsirləndirilir. O, Azərbaycandan qaçdığı üçün barəsində dövlətlərarası axtarış elan olunub və saxlanılması üçün İnterpola müraciət edilib. Q. İbrahimov “Azkomp” MMC-nin direktorudur.
Qeyd edək ki, son vaxtlar Azərbaycanda vergidən yayınan xeyli sayda yerli və əcnəbi iş adamları beynəlxalq axtarışa verilib.
Azərbaycanda analoq TV yayımı tamamilə dayandırılır
19.11.2015
Bu il dekabrın 31-də Azərbaycanda analoq televiziya yayımı dayandırılacaq.
Ölkə.Az xəbər verir ki, bunu Trend-ə açıqlamasında Milli Televiziya və Radio Şurasının Texniki şöbəsinin müdiri İsa Məmmədov deyib.
Onun sözlərinə görə, Azərbaycan bununla bağlı üzərinə öhdəlik götürüb.
Qarakənd faciəsindən 24 il ötür
20.11.2015
Ümumilikdə qəza nəticəsində 22 nəfər həlak olub
Xocavənd rayonunun Qarakənd kəndi üzərində “Mi-8” vertolyotunun ermənilər tərəfindən vurulmasından 24 il ötür.
1991-ci il noyabrın 20-də vertolyotun vurulması nəticəsində Azərbaycanın bir çox dövlət xadimləri və jurnalistlər həlak olublar.
Həlak olanlar arasında dövlət katibi Tofiq İsmayılov, baş prokuror İsmət Qayıbov, dövlət müşaviri, sabiq daxili işlər naziri Məhəmməd Əsədov, millət vəkilləri Vaqif Cəfərov, Vəli Məmmədov, baş nazirin müavini Zülfü Hacıyev, Prezident Aparatının şöbə müdiri, jurnalist Osman Mirzəyev, Qazaxıstan daxili işlər nazirinin müavini Sanlal Serikov, Azərbaycan Dövlət Televiziyasının jurnalisti Alı Mustafayev də var. Ümumilikdə qəza nəticəsində 22 nəfər həlak olub.
1991-ci il noyabrın 20-də “Mi-8” hərbi vertolyotunda həlak olanları bir daha xatırladırıq: (APA)
- Tofiq Kazım oğlu İsmayılov - dövlət katibi
- İsmət İsmayıl oğlu Qayıbov - Baş prokuror
- Məhəmməd Nəbi oğlu Əsədov - dövlət müşaviri
- Zülfi Saleh oğlu Hacıyev - Baş nazirin müavini
- Vaqif Cəfər oğlu Cəfərov - millət vəkili
- Vəli Hüseyn oğlu Məmmədov - millət vəkili
- Osman Mirzə Hüseyn oğlu Mirzəyev - Prezident Aparatında şöbə müdiri
- Qurban Hüseyn oğlu Namazəliyev - nazir müavini
- İqor Aleksandroviç Plavski - DQMV-nin prokuroru
- Vladimir Vladimiroviç Kovalyov - DQMV Daxili İşlər İdarəsinin rəisi
- Sergey Semyonoviç İvanov - Dağlıq Qarabağ üzrə Milli Təhlükəsizlik Şöbəsinin rəisi
- Nikolay Vladimiroviç Jinkin - fövqəladə vəziyyət rayonunun komendantı
- Sanlal Dasumoviç Serikov - Qazaxıstan DİN-in müavini
- Mixail Dmitriyeviç Lukaşov - milis general-mayoru
- Oleq Nikolayeviç Koçerev - polkovnik-leytenant
- Rafiq Məmməd oğlu Məmmədov - dövlət katibinin köməkçisi
- Alı Mustafa oğlu Mustafayev - telejurnalist
- Arif İsmayıl oğlu Hüseynzadə - AzTV-də işıqçı
- Fəxrəddin İbrahim oğlu Şahbazov - video-operator
- Vyaçeslav Vladimiroviç Kotov - vertolyot heyətinin komandiri
- Gennadi Vladimiroviç Domov - vertolyot heyətinin üzvü
- Dmitri Borisoviç Yarovenko - vertolyot heyətinin üzvü
QHT-lərlə bağlı yeni qaydalar təsdiqləndi
20.11.2015
Azərbaycan Nazirlər Kabineti “Qeyri-hökumət təşkilatları, habelə xarici dövlətlərin qeyri-hökumət təşkilatlarının filial və ya nümayəndəlikləri tərəfindən xarici maliyyə mənbələri hesabına xidmətlərin göstərilməsi və ya işlərin görülməsi haqqında müqavilələrin qeydiyyata alınması Qaydası”nı təsdiq edb.
Nazirlər Kabinetindən verilən məlumata görə, müqavilələr bağlanıldığı tarixdən 15 gündən gec olmayaraq, xidmət göstərən (iş görən) qeyri-hökumət təşkilatı tərəfindən qeydiyyata alınması üçün Ədliyyə Nazirliyinə təqdim edilir. Müqavilə olmadan və ya qeydiyyata alınmayan müqavilələr üzrə bank əməliyyatları və hər hansı digər əməliyyatlar aparıla bilməz. Xarici ölkədə tərtib edilmiş sənədlər həmçinin leqallaşdırılmalıdır.
“Azərişıq” borclu abonentlərə xəbərdarlıq etdi
20.11.2015
“Azərişıq” ASC borclu abonentlərə xəbərdarlıq edib.
Bu barədə “Azərişıq” ASC-dən Ölkə.Az-a bildirilib.
“ASC-nin fəaliyəti dövründə debütor borcu yaranmış abonentlərin elektrik enerjisi təchizatı noyabrın 23-də, saat 12:00-dan etibarən müvafiq qanunvericliyə uyğun qeyd-şərtsiz və fərdi qaydada dayandırılacaq.
Elektrik enerjisindən istifadə ilə bağlı yaranmış borca görə enerji təchizatı dayandırılmış abonentlərin “Borc Ödənilmədən Şəbəkəyə Özbaşına Qoşulma”sı elektrik enerjisinin talanması və elektrik enerjisindən qanunsuz istifadə sayıldığından, belə hallara yol vermiş şəxslərin Azərbaycan Respublikası Qanunvericiliyinə uyğun “Azərişıq” ASC tərəfindən ciddi tədbirlər görüləcək”, - deyə qurumdan qedy edilib.
Gömrükdə problem: Rusiya malları buraxmır
20.11.2015
Rusiyanın yol vergisi ilə bağlı ölkə qanunvericiliyində həyata keçirdiyi yeni düzəlişlər bu ölkədə fəaliyyət göstərən bir sıra nəqliyyat şirkətlərinin etirazına səbəb olub. Nəticədə ölkənin nəqliyyat sektorunda fəaliyyət göstərən şirkətlərin bəziləri tətil elan edərək işi dayandırıb.
Dövlət Gömrük Komitəsindən verilən məlumata görə, yükdaşımalara təsir edən bu hadisə Azərbaycandan Rusiyaya aparılan kənd təsərrüfatı məhsullarının da daşınmasında problem yaradıb. Belə ki, sərhədi maneəsiz şəkildə qarşı tərəfə keçən yüklərin təyinat məntəqələrinə, xüsusilə Moskva və Moskva ətrafı regionlara çatdırılmasında əngəllər meydana gəlib.
Dövlət Gömrük Komitəsi bildirir ki, ölkənin Rusiya ilə sərhəddə yerləşən gömrük-keçid məntəqələrinin fəaliyyətində hər hansı problem yoxdur və gömrük-keçid məntəqələri müəyyən olunan qrafik əsasında gömrük nəzarəti işini həyata keçirir.
Xatırladaq ki, yaranmış problemin həlli ilə bağlı Azərbaycan Dövlət Gömrük Komitəsi rəsmi olaraq Rusiya Federal Gömrük Xidmətinə müraciət edib.
Bakıda nurçulara qarşı əməliyyat
20.11.2015
Hüquq-mühafizə orqanlarının əməkdaşları Bakının Yasamal rayonunda nurçuluq təriqətinin üzvlərinə qarşı əməliyyat keçirib.
Ölkə.Az-ın “Report”-a istinadən verdiyi xəbərə görə, Moskva prospekti ev-75, mənzil 78 ünvanına baxış zamanı nurçuluğu təbliğ edən 70-dən artıq ədəbiyyat aşkarlanıb.
Bundan başqa, nurçuluq təriqətinin 10-dan artıq üzvü saxlanılıb.
Faktla bağlı araşdırmalar davam etdirilir.
Qızdırma salan dərmanlar uşaqlar üçün təhlükəlidir
20.11.2015
Havaların soyuması uşaqlarda immunitetin zəifləyərək tez-tez xəstələnmələrinə və bədən temperaturlarının yüksəlməsinə səbəb olur. Bəzi hallarda analar uşağının bədən temperaturunun yüksəlməsinin mənfi fəsadlar verəcəyindən ehtiyat edərək, qızdırmanı salan dərmanlardan (temperatur əleyhinə) istifadə etməklə hərarəti tez bir zamanda salmağa çalışırlar. Lakin analar nəzərə almırlar ki, həkim nəzarəti olmadan istifadə edilən dərmanlar uşaqların səhhətinin pisləşməsinə və bir çox mənfi fəsadların yaranmasına gətirib çıxarır.
Əflatun Amaşov medianı həssas olmağa çağırdı
20.11.2015
Azərbaycan mətbuatı ölkədə baş verən hadisələrə həssaslıqla yanaşır, ancaq təəssüflər olsun ki, bu həssaslıq bəzən hiss olunmur.
Bunu Mətbuat Şurasının (MŞ) sədri Əflatun Amaşov bu gün Mətbuat Şurası tərəfindən “Media və məsuliyyət: mövcud durum və perspektiv vəzifələrə baxış” mövzusunda “dəyirmi masa”da çıxışı zamanı deyb.
Ə.Amaşov bildirib ki, həm təmas xəttində baş verən hadisələri, həm Milli Məclisə keçirilən seçkiləri və digər hadisələri nəzərə alaraq görürük ki, media öz işini lazımi qaydada yerinə yetirir və həssaslıq nümayiş etdirir: "Ancaq çox təəssüf ki, araşdırma apararkən o həssaslıq bəzən hiss olunmur”.
Azərbaycanda azyaşlıların məscidə girişi qadağan olundu
20.11.2015
Gəncə şəhər İcra Hakimiyyətinin başçısı Elmar Vəliyev ötən gün şəhərin Əhməd Cavad küçəsi 47 saylı mənzildə qanunsuz fəaliyyət göstərən "Yehova şahidləri" təriqətinin 27 nəfər üzvünün polis tərəfindən saxlanılmasına münasibət bildirib.
Ölkə.Az-ın report-a istinadən məlumatına görə E.Vəliyev deyib ki, Gəncədə milli-mənəvi dəyərlərə zidd olan, eləcə də Dini Qurumlarla İş üzrə Dövlət Komitəsindən qeydiyyatdan keçmədən fəaliyyət göstərən dini cərəyanlara qarşı mübarizə ciddi şəkildə aparılacaq.
Rövşən Əkbərov Bakı korpusunun rəhbərliyinə gətirildi
20.11.2015
Müdafiə Nazirliyində kadr dəyişikliyi olub.
Hərbi mənbələrdən daxil olan məlumata görə, rotasiya qaydasında Şəmkir korpusunun komandiri Rövşən Əkbərov Bakı korpusuna, bu korpusun komandiri Xəqani Cəbrayılov Şəmkir korpusuna, Mayis Məmmədov isə Beyləqan korpusuna komandir təyin olunublar.
Qeyd edək ki, Rövşən Əkbərov əvvəllər də Bakı korpusunun komandiri olub.
Nazir: Turistlərin ölkəyə gətirdikləri pullar azalıb
21.11.2015
“Gəlirlərimiz aşağı düşüb”.
Mədəniyyət və turizm naziri Əbülfəs Qarayev ölkəyə gələn turistlərdən və onların gətirdikləri gəlirlərdən danışıb.
Ölkə.Az xəbər verir ki, bu barədə nazir ANS tv-yə bildirib.
Nazir ötən illə müqayisədə turistlərin sayında azalma olduğunu deyib:
“Ötən il gəlirlərimiz 2 milyon 800 min olmuşdu. Bu il isə gəlirlərimiz azalaraq 2 milyon 500 min olub. Çünki, ölkəmizə Rusiyadan gələn turistlərin axını azalıb. Orta hesabla biz 1 milyon 500 min nəfər turistin ölkədə xərclədiyi vəsaiti götürsək bu, 1 milyard 400 milyon manat edir”.
Uorlik: Qarabağ әtrafındakı 7 rayon Azәrbaycanın nәzarәtinә qaytarılmalıdır
21.11.2015
Mәn daha әvvәl Karnegi Fondunda çıxışım zamanı da bildirmişdim ki, hәrtәrəfli hәllin bir hissәsi kimi Dağlıq Qarabağ әtrafındakı 7 rayon Azәrbaycanın nәzarәtinә qaytarılmalıdır.
Ölkə.Az xəbər verir ki, bunu APA-ya açıqlamasında ATƏT-in Minsk qrupunun amerikalı həmsədri Ceyms Uorlik Rusiyanın xarici işlər naziri Sergey Lavrovun Ermənistan son səfərindən sonra Dağlıq Qarabağ ətrafındakı bir neçə rayonun qaytarılmasının gündəmə gəlməsi barədə məlumatlara münasibət bildirərkən deyib.
C. Uorlik bildirib ki, hәllin digәr vacib elementi Dağlıq Qarabağın statusunun müәyyәnlәşdirilməsi olacaq.
"Bu elementlәri özündә birlәşdirәn hәllә çatmaq üçün siyasi iradә tapmaq prezidentlәr üçün çox vacibdir”, - deyə C. Uorlik vurğulayıb.
İdman yarışına aldığı bileti baha satmaq istəyənlər cərimələnəcək
21.11.2015 1
Azərbaycan Prezidenti İlham Əliyev İnzibati Xətalar Məcəlləsinə dəyişikliklər edilməsi haqqında Qanunu təsdiqləyib.
Ölkə.Az dövlət başçısının rəsmi saytına istinadən xəbər verir ki, bundan sonra kütləvi idman tədbirlərinə və idman yarışlarına giriş biletlərinin “Bədən tərbiyəsi və idman haqqında” Azərbaycan Respublikasının Qanununa uyğun olaraq müəyyən edilmiş tariflərdən yüksək qiymətə satılmasına görə yalnız vəzifəli və hüquqi şəxslər deyil, həm də fiziki şəxslər cərimələnəcəklər.
Ölkə.az
