Qərbin Gürcüstanda "sonuncu qala"sı da dağıdıldı: Makronun agenti olan prezidenti həbs gözləyir

Gürcüstanda hakimiyyət çevrilişinə cəhdlər baş tutmaza, Qərbin bu ölkədəki "agentura şəbəkəsi"nin qiyamçı təmsilçilərinin gələcək taleyi böyük risk altında qalacaq... Mixail Saakaşvilidən fərqli olaraq, Fransaya xidmət göstərməklə, Gürcüstana xəyanət etmiş prezident Salome Zurabişvili indi onun taleyini eynilə yaşamaq təhlükəsi qarşısındadır...
Cənubi Qafqazda cərəyan edən geopolitik proseslər hazırda daha çox iki istiqamət üzrə inkişaf edir. Birinci istiqamət Azərbaycan və Ermənistan arasında yekun sülh sazişinin mətninin razılaşdırılmasına yönəlikdir. Bu prosesə ABŞ, Avropa Birliyi və Fransanın kobud kənar müdaxilə cəhdləri mövcuddur. Ancaq rəsmi Bakı bu kobud kənar müdaxilə cəhdlərinə qətiyyətlə müqavimət göstərməkdə davam edir. Və nəticədə bu cəhdlərin bloklanmasına paralel olaraq, Azərbaycan-Ermənistan sülh danışıqları ikitərəfli təmaslar formatına bağlı qalmaqdadır.

Ölkə.az "Yeni Müsavat"a istinadən xəbər verir ki, Cənubi Qafqaz üzrə geopolitik proseslərin ikinci istiqamətinə gəldikdə isə burada Gürcüstan böhranı əsas ziddiyyət faktorudur. Belə ki, Gürcüstanda siyasi böhran yaşanmaqdadır. Bu siyasi böhrana isə yenə də ABŞ, Avropa Birliyi və Fransa kobud şəkildə kənardan müdaxilə etməyə cəhd göstərir. Əslində, Gürcüstanda hazırda yaşanan ölkədaxili siyasi böhranın əsas stimullaşdırıcı faktoru da elə ABŞ, Avropa Birliyi və Fransanın kobud kənar müdaxiləsidir. Və bu səbəbdən də, Qərb siyasi dairələrinin hazırda öz davranışları ilə Gürcüstanın daxili işlərinə qarışdığı qətiyyən şübhə doğurmur.

Onu da qeyd etmək lazımdır ki, Gürcüstanda keçirilən son parlament seçkilərindən sonra rəsmi Tiflis total şəkildə beynəlxalq təzyiqlərə məruz qoyulmaqdadır. Xüsusilə də, Qərb siyasi dairələrinin seçkilərin nəticələrini şübhə altına alması Gürcüstan vətəndaşlarının mövqeyinə açıq hörmətsizlik xarakteri daşıyır. Yəni, ABŞ və Qərb xarici kəşfiyyat servisləri tərəfindən idarə olunan "qrant agentirası"nın parlament seçkilərində ağır məğlubiyyəti ilə barışmaq istəmir. Əksinə, nəyin bahasına olursa-olsun, "qrant aventurası"nın təmsilçilərini hakimiyyətə gətirməklə, Gürcüstanı da Ermənistan kimi, Qərbin geopolitik müstəmləkəsinə çevirməyə cəhd göstərir. Və hələlik bu hədəfə çatmaqda kifayət qədər ciddi problemlərlə üzləşir.

Məsələ ondadır ki, ABŞ, Avropa Birliyi və Fransanın bütün ortaq məkrli planlarına baxmayaraq, hakimiyyətdə olan "Gürcü arzusu" Partiyası ölkədaxili və xarici təzyiqlərə tab gətirməyi bacarır. Gürcüstana qarşı Qərbin siyasi sanksiyaları hələlik gözlənilən nəticələrdən çox-çox uzaqdır. Rəsmi Tiflis hesab edir ki, Gürcüstanın müstəqil xarici siyasət kursu yürütməsi Qərb siyasi dairələrini qıcıqlandırır. Və ona görə də, Gürcüstanda dövlət çevrilişi etmək üçün bütün imkanlardan istifadə olunur.

Avropa Birliyi ölkələrinin Gürcüstana qiyamçı "qrant aventurası"na dəstək üçün xüsusi emissarlar göndərməsi ümumiyyətlə, beynəlxalq hüququn kobud şəkildə pozulmasıdır. Çünki Avropa Birliyi başqalarına qarşı təzyiq mexanizminə çevirdiyi "dəyərləri" belə heçə sayaraq, Gürcüstanda Qərbə bağlı hakimiyyət formalaşdırmaq cəhdləri siyasi riyakarlıq deməkdir. ABŞ və Qərbin Gürcüstan vətəndaşlarının siyasi iradəsinə hörmətlə yanaşması olduqca vacibdir. Və Qərbin hər hansı xalqın, yaxud dövlətin siyasi seçimlərinin doğru olub-olmadığına hökm vermək hüququ yoxdur.

Maraqlıdır ki, beynəlxalq hüquq normalarının tələbləri tamamilə fərqli məzmun daşısa da, Gürcüstanda "müxalifət" funksiyalarını öz üzərinə götürmüş "qrant aventurası" Avropa Birliyinə hakimiyyətin legitimliyini tanımamaq çağırışı edib. Halbuki, Avropa Birliyinin bu quruma üzv olmayan hansısa müstəqil dövlət barədə qərar vermək hüququ mövcud deyil. Ancaq indi "qrant agenturası"nın düşdüyü durum Avropa Birliyindən dəstək ummaq məcburiyyətini daha da gücləndirib. Və bu, o deməkdir ki, Qərb kəşfiyyatının təlimatı ilə hərəkət edən qüvvələri üçün sonun başlanğıcı inkaredilməz reallıqdır.

Məsələ ondadır ki, Qərb əleyhinə mövqeyi ilə seçilən keçmiş futbolçu Mixail Kavelaşvili Gürcüstan prezidenti seçilib. Yəni, Gürcüstanda ABŞ, Avropa Birliyi və Fransanın müdaxilə etməyə can atdığı siyasi dövrə artıq qapanmaq üzrədir. Hər halda, Qərb siyasi dairələri Fransa kəşfiyyatı tərəfindən idarə olunan prezident Salome Zurabişvilini də itirir. Daha doğrusu, Gürcüstana deyil, məhz Qərb siyasi dairələrinə xidmət edən Salome Zurabişvilinin dövlət postu əldən çıxmaqdadır. Və bu, Qərb üçün Gürcüstanda sonuncu siyasi mexanizmin də itirilməsi anlamı daşıyır.

Onu da qeyd etmək lazımdır ki, prezident Salome Zurabişvilinin Gürcüstana xidmət etmədiyini hətta bu ölkənin sərhədlərindən kənarda da bilirlər və etiraf edirlər. Belə ki, BMT-nin İnsan Haqlarının, Demokratik və Ədalətli Beynəlxalq Nizamın Təşviqi Şurasının keçmiş eksperti Alfred de Zayas Gürcüstanda parlamentin Mixail Kavelaşvilini prezident seçməsinin bu ölkə üçün böyük önəm daşıdığını vurğulayıb: "Gürcüstan parlamenti Avropa Birliyi və ABŞ-nin marioneti olan Salome Zurabişvilini əvəz edəcək Mixail Kavelaşvilini prezident seçdi. Salome Zurabişvilinin səlahiyyət müddəti isə 2024-cü il dekabrın 29-da başa çatacaq. Bu, Gürcüstan üçün olduqca yaxşı dəyişiklikdir".

Göründüyü kimi, bu ayın sonunda səlahiyyəti sona çatacaq Salome Zurabişvilinin Gürcüstan üçün ziyanlı siyasi fiqur olduğu artıq heç kəsə sirr deyil. Nə qədər qəribə də olsa, Fransanın agenti olan bu qadın gedərayaq Gürcüstana növbəti zərbənin vurulması barədə düşünür. Belə ki, o, bildirib ki, istefa verməyəcək, öz postunu tərk etməyəcək, prezident sarayında fəaliyyətini davam etdirəcək.

Halbuki, heç kim onun istefasını istəmir, çünki səlahiyyət müddəti zatən bir neçə gün sonra sona çatacaq. Üstəlik, onu əvəzləyəcək yeni prezident də seçilib. 29 dekabrdan sonra Salome Zurabişvili prezident statusunu itirərək, sadəcə, Fransanın agenti olaraq, fəaliyyət göstərə bilər. Və o, dövlətə xəyanət ittihamı ilə prezident sarayından birbaşa həbsxanaya da göndərilə bilər.

Gürcüstan parlamentinin onun keçmiş prezident kimi dövlət mühafizəsindən məhrum edilməsi barədə qanunu tez-tələsik qəbul etməsi də Salome Zurabişvili üçün "dəmir barmaqlıqlar" arxasına düşmə ehtimalını artırır. Vaxtilə keçmiş prezident Mixail Saakaşvili Salome Zurabişvilini siyasi elitaya çıxartmışdı. Ancaq Salome Zurabişvili prezident postunda olduğu müddətdə, vaxtilə yaşadığı ziddiyyətlər ucbatından hələ də kin bəslədiyi Mixail Saakaşvili barəsində əhv qərarı vermədi. Və Mixail Saakaşvilidən fərqli olaraq, Fransaya xidmət göstərməklə, Gürcüstana xəyanət etmiş prezident Salome Zurabişvili indi onun taleyini eynilə yaşamaq təhlükəsi qarşısındadır.

Bir müddət öncə "Gürcü arzusu" Partiyasının qurucusu Bdzina İvanişviliyə zəng edən Fransa prezidenti Emmanuel Makronun Salome Zurabişvilini xilas edə biləcəyi hələlik o qədər də inandırıcı görünmür. Çünki bütün proseslər Gürcüstanın ABŞ, Avropa Birliyi və Fransanın məkrli planlarını pozmaq istiqamətində mövqe tutduğunu büruzə verir. Və bu, onu göstərir ki, hakimiyyət çevrilişinə göstərilən cəhdlər baş tutmaza, Qərb Gürcüstana təsir mexanizmlərini itirəcək, Salome Zurabişvili başda olmaqla, "agentura şəbəkəsi"nin qiyamçı təmsilçilərinin gələcək taleyi böyük risk altında qalacaq.