Su qatılmış benzin: Maşına dəhşətli zərər verir

Bəzi yanacaqdoldurma məntəqələrində benzin və dizelə su qatılması iddiaları artmaqdadır. Sürücülərin və avtomobil təmirçilərinin bir çoxu bu iddianı təsdiqləyir.

Ölkə.az xəbər verir ki, mövzu ilə bağlı "Yeni Sabah"a danışan təcrübəli avtomobil təmirçisi Xəyyam Səlimov bildirib ki, son model maşınların bir çoxu yanacaqda su qatqısı olduğu zaman işə düşmür:

“Benzinə su və ya başqa maddənin qatılması maşınlara ciddi ziyan vurur. Son model maşınlar bu kimi hallarda ümumiyyətlə yerindən tərpənmir. Çünki mühərrikin içində olan indeqator yanacağı qəbul etmir və işə salmağa qoymur. Köhnə maşınlar isə bir az yol gedir və daha sonra mühərrik sönür. Elə bil kimsə xəstələnir, həkim də deyir ki, filan dərmanı iç. Həmin adam isə tövsiyə edilən dərmanı başqa dərmanla əvəzləyir və daha betər günə düşür”. 

Usta qeyd edib ki, belə hallar avtomobilin bir çox hissələrinə ciddi zərərlər vurur:

“Yanacağa su qatma ötürücü, mühərrik, yanacaq çəni və digər bir çox detalları da məhv edir. Benzinin tərkibinə qarışan su qısa zamanda avtomobilin yanacaq sisteminə, nasosa, eləcə də silindirlərə ciddi zərər vurur. Lakin bəzi avtomobil firmaları bunu nəzərə alaraq əlavə filtrlər quraşdırır. Nəticədə su çənə daxil olduqda maşının beyninə (ECU) bu barədə bildiriş gedir. Hətta bəzi avtomobillərdə benzindən ayrılan suyu xaric etmək üçün əlavə qurğular belə var”.