"Rusiya xəbərdarlıqlardan nəticə çıxarmadığına görə, sonda belə bir insident baş verdi"

Xəbər verildiyi kimi bu dəqiqələrdə Türkiyə-Suriya sərhədində Rusiyaya məxsus Su-24 tipli qırıcı təyyarə vurulub.

Türkiyə Silahlı Qüvvələrinin Baş Qərargahından verilən məlumatda təyyarənin ölkənin hava sərhədlərini pozduğuna görə hava hücumundan müdafiə qüvvələri tərəfindən vurulduğu bildirilir.

Rusiya Müdafiə Nazirliyi isə vurulan təyyarənin onlara məxsus olduğunu təsdiqləsə də, onun Suriyanın hava məkanında vurulduğunu iddia edir. Vurulan rus təyyarəsinin iki pilotunun aqibəti haqda isə hələlik məlumat yoxdur.

Baş vermiş bu insidentlə əlaqədar Ölkə.az hərbi ekspert Üzeyir Cəfərovun fikirlərini öyrənib.

"Hadisə baş verib və hadisəyə hər iki ölkənin rəsmi dairələri artıq münasibət bildiriblər. Türkiyə ordusunun rəhbərliyi, baş nazir, hətta prezident Ərdoğan belə rus təyyarəsinin ölkəsinin hava sərhədini pozduğuna görə vurulduğunu bəyan etdilər. Türkiyənin özünü qorumaq haqqı var. Rusiya Müdafiə Nazirliyinin ikibaşlı bəyanatı isə məsələni şişirtmək, araşdırma aparmaq, guya özünün haqlı olduğunu sübut etmək cəhdindən başqa bir şey deyil. Rusiya iddia edir ki, təyyarəsi 6 min metr hündürlükdə uçub və Suriya ərazisində vurulub. Əvvəla unutmamalıyıq ki, Türkiyənin hava hücumundan müdafiə sistemləri yüksək səviyyədədir və NATO standartlarına cavab verir. Onların səhv etmək ehtimalı demək olar ki yoxdur. Rusiya isə öz sərhədlərindən uzaqda müharibə aparan dövlət kimi bu kimi itkilərə hazır olmalıdır. Xəzərdən Suriyanı vurmaqla Rusiya elə bilir ki, hər şey edə bilər, istədiyi dövlətin sərhədini pozub ona təzyiq göstərə bilər. Amma gördüyümüz kimi bu heç də belə deyil. Türkiyə Rusiyanı Suriyada hərbi əməliyyatlara başlayandan indiyədək dəfələrlə xəbərdar etmişdi. Rusiya bundan nəticə çıxarmadığına görə sonda belə bir insident yaşandı.

- Üzeyir müəllim bu hadisə siyasi müstəvidə Rusiya ilə Türkiyə arasında gərginliyə gətirə bilər?

- Buna inanmıram, çünki hazırkı durumda Türkiyə Rusiyaya daha çox lazımdır. Rusiyanın ağır iqtisadi duruma düşdüyü, bütün Avropa ölkələrinin ondan üz döndərdiyi bir zamanda Ərdoğan Putinə həmişə dəstək oldu və Qərbin Moskvaya qarşı tətbiq etdiyi sanksiyalara Türkiyə qoşulmadı. Rusiya təyyarəsinin iki ölkə arasında hərbi konfliktə gətirib çıxaracağına inanmıram.

Ölkə.az