Vurulan rus təyyarəsinin pilotlarından xəbər var

Bu gün səhər Türkiyə hava sərhədini pozduğu üçün Türkiyə hərbi təyyarələri tərəfindən vurulan Rusiyaya məxsus “Su24” hərbi təyyarəsinin katapultasiya edən pilotlarından birinin yerə çaxılaraq öldüyü xəbəri yayılıb.

Ölkə.az xəbər verir ki, bu haqda "Hürriyet" qəzetinin saytında məlumat yayılıb. Katapultasiya edən pilotlardan birinin yerə düşərkən öldüyü, digərinin isə sağ qaldığı və türkmənlərin əlində olduğu bildirilir. Ölən pilotun fotosu da yayılıb.

Xatırladırıq ki, hazırda ərazidə Rusiyaya məxsus 2 döyüş helikopteri pilotların axtarışını davam etdirir. Amma əraziyə türkmən birliklərinin nəzarət etməsi rus helikopterlərinin yerə enməsinə imkan vermir. Təyyarənin vurulmasından 20-25 dəqiqə sonra isə ərazidəki türkmənlərin mövqeləri havadan və qurudan güclü atəşə məruz qalıb.

Sayt xəbər verir ki, vurulan Rusiya təyyarəsinin yerdə partlaması nəticəsində 2 nəfər Türkiyə vətəndaşı yaralanıb. Onlar Türkiyənin Suriya ilə həmsərhəd Hatay vilayətinin Yayladağ rayonunun Dutlubahçe kəndinin sakinləridir. Yaralıların xəstəxanaya aparıldığı bildirilir.

Ölkə.az