“Müasir Kadr Akademiyası”nın ilk mərhələsi uğurla həyata keçirildi

Azərbaycan Respublikasının Prezidenti yanında Gənclər Fondunun maliyyə dəstəyi ilə “Yeni Yol” Gənclərin Maarifləndirilməsi İctimai Birliyi tərəfindən reallaşan “Müasir Kadr Akademiyası” layihəsinin ilk mərhələsi uğurla başa çatdı. 

Layihə çərçivəsində ilkin olaraq 2 sahə üzrə dərslər keçirildi – “Sosial Media Marketinq” və “Fotoqraflıq”. Dərslər tam interaktiv, qeyri-formal metodlarla peşəkar təlimçilər tərəfindən keçirilirdi. Bundan əlavə layihə iştirakçıları ilə görüşmək üçün həftədə 1 dəfə öz sahəsində uğur qazanmış peşəkarlar dəvət olunmuşdu və onlar da öz təcrübələri ilə iştirakçılarla paylaşıblar. Dərs zamanı iştirakçılar sadəcə teoretik bilgi yox, daha çox real praktiki bilgilər və bacarıqlar əldə etdilər, hansı ki, onlara gələcəkdə bu sahədə inkişaf etməkdə birbaşa kömək olacaq.

Plana əsasən layihənin ikinci mərhələsi “Qrafik dizayn” və “Mühasibatlıq” dərsləri artıq başlayıb. Layihənin sonunda isə gənclər 3 günlük düşərgəyə cəlb olunacaqlar. Düşərgə zamanı onlar karyera planlaması, iş həyatı və onun qanunları, iş axtarma yolları, rezyume hazırlanması və müsahibə qaydaları mövzularında məlumat alacaqlar və bu da onları iş həyatına başlamalarına dəstək olacaq.

Layihənin əsas məqsədi xüsusi qayğıya ehtiyacı olan gəncləri (internat və uşaq evi məzunları, məcburi köçkün və qaçqın, az təminatlı ailələrdən olan gənclər) müasir əmək bazarının ehtiyac duyduğu ixtisaslarla tanış etməkdir. Onlar seçdikləri müvafiq sahələr üzrə kurslara cəlb edilərək inkişaf edib, təcrübə qazanacaq, təlimlərin köməyi ilə iş həyatına hazırlanıb ixtisaslı kadr olaraq akademiyanın məzunu olacaqlar.

Ölkə.Az