\"Təyyarə məsələsi olmasa belə, o ərazidə Rusiya ilə Türkiyə qarşıdurması olacaqdı\"

Türkiyə hava məkanını pozan Rusiya hərbi təyyarəsini vurdu.

Putin bundan sonra açıqlamasında bildirdi ki, bu hadisə "terroru dəstəkləyənlərin" bizə "arxadan vurduğu" zərbədir. Bizim təyyarələrimiz Suriyada terrorçularla mübarizə aparırlar və heç kimə təhlükə törətməyiblər.

Türkiyənin Rusiya hərbi təyyarəsini vurması hansı nəticələrə gətirib çıxara bilər? Rusiya bu məsələdən sonra hansı addımları atacaq?

Bu sualları D18 Hərəkatının sədri Ruslan İzzətli Ölkə.Az-da cavablandırıb:

"Türkiyə və Rusiyanın maraqları Suriyada öncədən də toqquşurdu. Ancaq son günlər Rusiya və Türkiyənin geosiyasi maraqları Suriyada özəlliklə Türkmən dağı məsələsində daha çox qarşı-qarşıya gəldi. Suriya yerüstü, Rusiya isə havadan türkmənlərə qarşı qətliam törətməkdə davam edirlər. Rusiya və Suriyanın bəhanəsi İŞİD-dir, ancaq orada nə İŞİD, nə də digər terrorçu birləşmələr var. Əksinə türkmənlər 5 ildir İŞİD-ə və digər radikal dini qruplaşmalara qarşı mübarizə aparırlar. Çox təəssüf ki, BMT Türkmən dağında baş verən soyqırıma susqunluqla yanaşır. Türkmənləri əsasən Türkiyə qorumağa çalışır. Bu məsələdə Türkiyə çox həssasdır. Türkiyənin təkcə iqtidarı yox, digər siyasi partiyaları və cəmiyyəti də bu məsələni diqqətdə saxlayır. Türkiyə indiyə qədər gözləmə vəziyyətindən aktiv bir siyasətə keçdi, bu da doğru bir addımdır.

Rusiyanın təyarəsinin vurulması gözlənilən idi. Təyyarə məsələsi olmasa belə, o ərazidə Rusiya ilə Türkiyə qarşıdurması olacaqdı. Türkiyə NATO üzvü olan bir dövlətdir. Rusiyanın atacağı adekvat addımlarından çox şey asılıdır.

Türkiyə ilə Rusiya arasında iqtisadi əməkdaşlıq yüksək səviyyədədir. İki ölkə arasındakı illik ticarət dövriyyəsi 50 milyard dollar həcmindədir. Düşünürəm ki, bu səbəbdən Rusiya Türkiyənin üzərinə çox getməyəcək".

Qeyd edək ki, bir müddət öncə də Rusiya hərbi təyyarələri Türkiyə sərhəddini pozmuş və o zaman Türkiyə yalnız xəbərdarlıqla kifayyətlənmişdi.

Səxavət Məmməd
Ölkə.Az