Peskov: Putin Türkiyəyə müharibə elan etməyib

Putin Türkiyə tərəfinin bu əməlinin cavabsız qalmayacağını dilə gətirib

Ölkə.Az-ın xəbərinə görə, Rusiya prezidentinin mətbuat katibi Dmitriy Peskov bildirib ki, Moskva Ankaraya Su-24 bombardmançısının vurulduğuna görə müharibə elan etməyib.

“Prezident hər hansı hərbi əməliyyatların başlanmasından söz açmayıb. Bundan sadəcə nəticə çıxarmaq lazımdır", - deyə Peskov vurğulayıb.

O qeyd edib ki, Putin Türkiyə tərəfinin bu əməlinin cavabsız qalmayacağını dilə gətirib.

Xatırladaq ki, Rusiya hərbi hava qüvvələrinin Suriyada daha bir helikopteri vurulub.

Rus helikopteri tank əleyhinə raketlə vurulub və ciddi zədə aldıqdan sonra Latakiya aerodromuna qəza enişi etmək məcburiyyətində qalıb. Helikopter Rusiya qırıcısının türklər tərəfindən yerə salınmasından bir neçə saat sonra vurulub. Vurulan helikopterin rus pilotların axtarışına çıxdığı güman edilir.

Ondan əvvəl isə Türkiyə hava məkanını pozan hərbi təyyarəni vurub.

Məlumata görə, Türkiyə sərhədləri yaxınlığında, Suriya ərazisində qəzaya uğrayan hərbi təyyarə Türkmən dağı ərazisindəki Qızıldağ istiqamətində yerə dəyib. Təyyarənin Rusiyaya məxsus olduğu təsdiqlənib.

Rəşid Mustafazadə

Ölkə.az