Aslan Kərimov: \"Qriqarçukun üsulu diktatorluq üsuludur\"

Bu gün avroliqada 5-ci turun görüşləri keçiriləcək. Təmsilçilərimizdən qrupdan çıxmaq şanslarını qoruyub saxlayan "Qarabağ" Bakıda "Totenhem"i qəbul edəcək. Güclü rəqibinə Londondakı oyunda məğlub olan köhlən atlılar bu gün adlı-sanlı rəqibindən xal qoparmağa çalışacaq.

Digər təmsilçimiz "Qəbələ"nin işi isə bir qədər çətindir. Qrupdan çıxmaq üçün PAOK-u səfərdə məğlub etməklə yanaşı həm də "Krasnadar"ın "Borussiya" (Dortmund) ilə oyundan xalsız ayrılmasına ümid etməlidir.

Ölkə.az hər 2 görüşlə bağlı yığma komandamızın keçmiş üzvü Aslan Kərimovun fikirlərini öyrənib.

- Aslan müəllim ilk olaraq "Qarabağ" - "Totenhem" görüşü haqda fikirlərinizi öyrənmək istəyirik. "Qarabağ" bildiyiniz kimi qrupdan çıxmaq şanslarını qoruyub saxlayır. Bu oyunda da klubumuza mütləq xal lazımdır. Ağdamlılar güclü London klubuna qarşı sizcə nəsə edə biləcəkmi?

- "Qarabağ" güclü rəqibinə qarşı ən azı 2-3 real qol vəziyyəti yarada biləcək potensiala sahib klubdur. Bu imkanları qol olaraq reallaşdırmaq baxımından biraz çətinlik çəkə bilərlər. "Totenhem" kimi klublarla görüşlərdə əlinə düşən vəziyyətdən yararlanmalısan. Düşünürəm ki, "Qarabağ" bu fürsətlərdən yararlana və qrupdan çıxmaq şanslarını saxlaya bilər.

- Ağdam klubunun həm müdafiə, həm də hücum xəttində ciddi itkiləri var. Bu hal oyuna necə təsir edəcək?

- Hücumda Reynaldo ilə Armentorusu müqayisə etsək hər iki futbolçunun özünə xas özəllikləri var. Reynaldo yüksək texnikaya və sürətə malik bir futbolçudur. Armentoros isə Reynaldodan daha təcrübəli futbolçudur. Sürətli bir futbolçu olmasa da, oyun epizodlarında qeyri adi işlər etməyə malikdir. "Monako" ilə görüşdəki vurduğu qolda da öz təcrübəsindən istifadə edərək ofsayddan yayındı. Bu baxımdan demək olmaz ki, hücum xəttində zəifləyəcəklər. Müdafiə xəttinə gəldikdə isə əgər bu axşam Rəşad Sadıqov oynamasa hesab edirəm ki, müdafiə xəttində lider olan bir futbolçunu itirmək "Qarabağ"ı acınacaqlı vəziyyətə sala bilər. Çünki Rəşadın meydanda olması belə komandaya əlavə motivasiya verir.

- Əgər Rəşad Sadıqov görüşü buraxmaq məcburiyyətində olarsa, alternativ olaraq kimləri görürsünüz?

- Güman ki, Maksim Medvedev mərkəzə çəkiləcək.

- Ehtiyatda olan Elvin Yunuszadənin də "Neftçi" klubunda avroliqa təcrübəsi var. Onun meydana çıxmaq şanslarını necə qiymətləndirirsiz?

- Doğru qeyd etdiniz, Elvinə də şans verə bilər. Lakin son oyunlarda daha çox müdafiənin mərkəzində Maksimə şans verilir.

- Digər təmsilçimiz "Qəbələ" çətin Yunanıstan səfərinə yollanır. PAOK-la oyun haqda fikirlərinizi öyrənmək istəyirik. Qəbələlilərin qrupdan çıxmaq şanslarını son tura saxlamaq ehtimalı varmı?

- "Qəbələ"nin qrupdan çıxmaq şansı demək olar ki yoxdur. Nəzəri baxımdan bəlkə də ola bilər, amma real baxsaq şansı sıfıra bərabərdir. Sadəcə son oyunlarda təcrübə toplaya bilərlər. Oyunun nəticəsi baxımından isə Yunanıstan futbolunu hamı tanıyır. Öz meydanlarında aqressiv futbol oynayırlar. Bu baxımdan "Qəbələ"nin işi "Borussiya" (Dortmund) ilə oyundakı kimi olacaq. Böyük hesablı məğlubiyyətə inanmıram, lakin səfərdən xalla gəlməyi çətin olacaq.

- "Qəbələ" artıq bir dəfə pley-off mərhələsində Yunanıstanın “Panatinaikos” klubu ilə qarşılaşıb və dueldən qalib ayrılıb. Sizcə, bu oyunun təcrübəsi bu görüşdə kömək edəcəkmi?

- Sözsüz ki təcrübəsi var. Lakin o zaman komandanın durumu necə idi, indi necədir bunları nəzərə almaq lazımdır. Daxili çempionatda keçirdiyi oyunlardan hiss olunur ki, komandada abu-hava yüksək səviyyədə deyil. Həmçinin pley-off mərhələsi ilə qrup mərhələsindəki oyunlarda fərqlər var.

- Son zamanlar "Qəbələ"nin zəif çıxışını Roman Qriqarçukun Ukrayna millisindən təklif alması ilə əlaqələndirirlər. Siz necə düşünürsünüz?

- Bu səbəb mənə inandırıcı gəlmir. Hər baş məşqçinin komandanın idarə etmək üsulu var. Kimsə idarə etmədə demokratdır, kimsə diktatordur, kimsə avtoritardır və s. Hər bir düşüncəyə sahib baş məşqçi öz işində uğura gedə bilir. Qriqarçukun üsulu diktatorluq üsuludur. Əgər uzun yol gedirsənsə oyunçuların səndən qorxması, hər oyuna ancaq 12-13 nəfərin dəyişməz olaraq meydana çıxması klubda inamsızlıq yaradır. Bunun nəticəsində isə komanda uğursuzluğa uğrayır.

Taleh Rəcəb
Ölkə.Az