Qənirə Təranəni müdafiə etdi: "Onu kameraya çəkib şəxsiyyətini alçaldıblar"

Hazırda ANS-in Vaşinqton bürosunda çalışan telejurnalist Qənirə Ataşova bir neçə gün öncə yol polisləri ilə prodüser Təranə Səmədova arasında yaranmış gərginliyə münasibət bildirib.

Ölkə.az-ın məlumatına görə, Ataşova bildirib ki, Səmədova polisləri məhkəməyə verə bilər:

"Heç vaxt şou-biznes xəbərləri ilə maraqlanmıram. Prodüsser Təranə haqqında xəbəri başlıqlarda görsəm də, oxumamışdım. Az əvvəl rəfiqələrimdən biri dedi ki, buna bax, gör qadına nə edirlər? Baxdım və dəhşətə gəldim. Videoda Təranənin sərxoş olduğu görünmür. Düzdür, böyük ehtimalla o, qanunu pozub, amma polis də çox kobud davranıb. Adam yalvarıb deyir ki, buraxın, oturacam. Amma polis əməkdaşı kobudluğundan qalmır. Bir qadına qarşı göz önündə bunu edənlər görün dalda nələr edir. Məncə, o polislər də məsuliyyətə cəlb olunmalıdır. Təranə də haqqını məhkəmədə axtara bilər. Qanunla Təranə yerindəcə cərimələnməli idi. Onu kameraya çəkib şəxsiyyətini alçaltmaq nəyə gərək idi? Ora gəlib qapını açmayan kişi isə sağ olsun. Kim olduğunu özü göstərdi. Son olaraq bildirirəm ki, bizim qadınlara siqaret və içki yaraşmır. Gül kimi dəyərlərimiz var. Onları qoruyaq”.

Xatırladaq ki, prodüsserin içkili olduğu qeyd edilsə də, sonradan bunun yanlış olduğu üzə çıxmışdı.

İntiqam VALEHOĞLU
Ölkə.az