Kremlin Azərbaycandakı media orqanında nələr baş verir?
Rusiyanın Beynəlxalq İnformasiya Agentliyi "Ria-Novosti"nin Bakı redaksiyasından bir qrup jurnalistin işdən getməsi ilə əlaqədar mediada xəbərlər yayılıb.
Başda Sputnik.az saytının şef-redaktoru Gülnarə Məmmədzadə olmaqla saytın 8 əməkdaşının işdən getməsi ilə bağlı Sputnik.az saytının əməkdaşları Ölkə.az açıqlama veriblər.
Daha sonra Ölkə.az baş verənlərlə bağlı "Ria-Novosti"nin Azərbaycan bölməsinin baş direktoru Əziz Əliyevin fikirlərini öyrənib.
Sputnik.az-ın əməkdaşlarının verdiyi məlumatda deyilir: "Əslində biz işdən getmək haqda ərizələrimizi ayın əvvəlindən yazmışdıq. Buna səbəb isə Əziz Əliyevin erməni və Qarabağ mövzusunda yazıların saytda getməsinə əngəl törətməsi idi. O, açıqdan-açığa Qarabağ mövzusunda Azərbaycanın mövqeyini işıqlandırmağa, ermənilərin əleyhinə yazılar yazmağa imkan vermirdi. Buna dəfələrlə etiraz etsək də məsələ olduğu kimi qalırdı və ona görə də biz bu gün özümüz redaksiyanı tərk etdik".
Ermənilərin əleyhinə yazılar verməyi qadağan etmək Əziz Əliyevin şəxsi təşəbbüsü idi, yoxsa "Ria Novosti"nin rəhbərliyi belə qərar vermişdi?" sualımıza isə Sputnik.az-ın keçmiş əməkdaşları bu haqda heç nə deyə bilməyəcəklərini bildiriblər.
Qeyd edək ki, Sputnik.az-ın informasiya siyasətini birbaşa Gülnarə Məmmədzadə müəyyən etsə də son zamanlar onun bu səlahiyyətləri birbaşa agentliyin Moskvadakı rəhbərliyinin qərarı ilə məhdudlaşdırılmışdı. Keçmiş əməkdaşların dediyinə görə, problemin kökündə duran məsələ də məhz budur. Buna görə də artıq onlar Azərbaycanın mövqeyini saytda tam olaraq işıqlandıra bilmirlər və bundan sonra belə bir informasiya orqanında qalmağı mənasız hesab edirlər.
Sputnik.az-da baş verənlərə agentliyin Azərbaycan böməsinin direktoru Əziz Əliyev isə belə münasibət bildirib:
"Sputnik.az saytı hazırda fəaliyyətini davam etdirir və işdə heç bir axsama yoxdur. Saytdan bir qrupun getməsi isə "Ria-Novosti" ilə "Novosti - Azərbaycan" arasındakı müqavilənin bitməsi ilə əlaqədardır. Mən kimliyimi heç vaxt gizlətməmişəm və bu şəxslərlə də artıq 3 ilə yaxındır işləyirəm. Maraqlıdır, bütün bunlar onların yadına niyə məhz indi düşdü?"
Xatırladırıq ki, adı çəkilən informasiya agentliyi Rusiyanın rəsmi dövlət agentliyidir. Agentliyin baş direktoru məşhur teleaparıcı Dmitri Kiseloy, baş redaktoru isə Marqarita Simonyandır.
Ölkə.az
