“Real” komandası rusiyalı futbolçuya görə diskvalifikasiya edilə bilər

İspaniya kubokunun 1/16 finalının birinci matçında “Real” “Kadis”ə 3:1 hesabı ilə qalib gəlib.

Matçın nəticəsi ləğv edilə bilər.

Hesabı 3-cü dəqiqədə rusiyalı futbolçu Denis Çerışev açıb, o, keçən mövsümdə kubokun yarımfinal matçında mart ayının 4-də “Vilyarreal” komandasında “Barselona”ya qarşı oyunda üçüncü sarı vərəqəni alıb.

İspan KİV-nin məlumatına görə, bu səbəbdən də onun “Kadis” ilə oyun üçün müraciətdə adı olmasına hüququ yox idi.

Madridlilərin skamyasında Borxa Mayrol da olub, halbuki gənclər arasında İspaniya kubokunun oyununda kənarlaşdırılma böyük turnirə də şamil edilir.

“Kadis” apellyasiyaya müraciət etsə şikayət təmin ediləcək, “Real” reqlamentə uyğun olaraq İspaniya kubokundan kənarlaşdırılacaq.

“Real”ın direktoru Emilio Butragenyo hesab edir ki, klubu meydanda Denis Çerışevin peyda olmasına görə cəzalandırmaq olmaz. Klubun rəhbərinin sözlərinə görə, klub oyunçunun diskvalifikasiyası barədə heç nə bilmirdi, ona görə də günahsızdır.

“Biz Çerışevin diskvalifikasiyası haqqında bilmirdik. Əgər hər hansısa oyunçu diskvalifikasiya edilibsə, bizə məlumat verilməlidir.

Biz belə bir məktub almamışıq. İspaniya Futbol Federasiyası bizə diskvalifikasiya haqqında bildirməyib. “Vilyarreal” da bizə müraciət etməyib. Biz heç nə bilmirdik, deməli, günahkar deyilik”.(oxu.az)

Ölkə.Az