Yol hərəkəti qaydalarını öyrənək və öyrədək” adlı layihəyə start verildi

03 dekabr 2015 – ci il tarixində Divan Exspress Bakı otelində “Yol hərəkəti qaydalarını öyrənək və öyrədək” adlı layihənin açılış mərasimi keçirilmişdir.

Açılış mərasimində Azərbaycan Respublikasının Prezidenti yanında Gənclər Fondunun nümayəndəsi Vüsalə Niftəliyeva, Nəqliyyat Nazirliyi Nəqliyyatı İntellektual İdarəetmə mərkəzinin (NİİM) İnnovativ inkişaf şöbəsinin rəisi Mirhəmid Bağırov, NİİM mətbuat xidmətinin rəhbəri Şəfa Mehmanqızı, “Həyat” Beynəlxalq Humanitar Təşkilatının sədri Azər Allahverənov, “Gənclərin Dostluq Şəbəkəsi” İctimai Birliyinin sədri İmaməddin Quliyev və digər gənclər təşkilatlarının nümayəndələri iştirak etdilər.

İlk olaraq “Gənclərin Dostluq Şəbəkəsi” İctimai Birliyinin sədri İmaməddin Quliyev çıxış edərək layihəni açıq elan edib. O, bildirdi ki, layihə çərçivəsində əsas hədəfimiz iştirakçılara təcrübəli ekspert və təlimçilər tərəfindən 15 dərs proqramı əsasında şəhər nəqliyyatında, yollarda ictimai davranış qaydaları, təhlükəsiz gənc sürücü, dönmə əməliyyatı, icazə verilən maksimum hərəkət sürətləri, nizamlayıcının göstərişləri, qəza nişanları, minik avtomobillərinin idarə olunması və s. mövzularda qeyri - formal təhsil metodundan istifadə olunaraq təlimlər və praktiki məşğələlər təşkil etməkdir.

Sonra qonaqlar iştirakçıları salamlayıb, layihə ilə bağlı fikirlərini bölüşərək tədbirin keçirilməsini əhəmiyyətli olduğunu hesab edib və gənclərə uğurlar arzuladılar.

Qeyd edək ki, 03 - 20 dekabr 2015 – ci il tarixləri arasında Azərbaycan Respublikasının Prezidenti yanında Gənclər Fondunun maliyyə dəstəyi, “Gənclərin Dostluq Şəbəkəsi” İctimai Birliyinin təşkilatçılığı və “IB Club” Gənclərin İnkişaf Mərkəzinin dəstəyi ilə keçirilən “Yol hərəkəti qaydalarını öyrənək və öyrədək” adlı layihənin icrasının başlıca məqsədi gənc sürücü və piyadaların yol hərəkəti qaydalarına dair bilik və bacarıqlarının artırılması, onlara təhlükəsiz davranış vərdişlərinin aşılanması, intellektual idarəetmə sistemi haqqında ətraflı məlumat verərək bu istiqamətdə nəzəri və praktiki biliklərin verilməsi, cəmiyyətdə sürücülük mədəniyyətinin səviyyəsini yüksəltmək və yol təhlükəsizliyin təmin olunmasında məlumatlılığın artırılmasından ibarətdir.

“Gənclərin Dostluq Şəbəkəsi” İctimai Birliyinin mətbuat katibliyi