70.5% düşünür ki, peşə təhsili ilə iş tapmaq rahatdır

70.5% düşünür ki, peşə təhsili ilə iş tapmaq rahatdır - SORĞU

“Azərbaycanda mövcud peşə təhsil sistemi və onun əmək bazarının tələblərinə uyğunluğu” mövzusunda sosioloji tədqiqat həyata keçirilib.

Ölkə.Az xəbər verir ki, Sosial Tədqiqatlar Mərkəzi nin keçirdiyi 12 iqtisadi rayonu əhatə edən sorğularda 18-29 yaş aralığında olan 3 yaş qrupu (16-19. 20-24. 25-29) üzrə ümumilikdə 1200 respondent iştirak edib.

Tədqiqat çərçivəsində respondentlərə yaşadıqları ərazidə onlar üçün əlçatan olan peşə təhsili müəssisəsinin mövcud olub-olmadığı barədə sual ünvanlanıb.
Sorğu iştirakçılarının 25.0%-i peşə təhsilinin çox əhəmiyyətli olduğunu, 65.8%-i əsasən əhəmiyyətli olduğunu bildirib. Respondentlərin ümumilikdə 8.3%-i peşə təhsilini əhəmiyyətsiz hesab edib, 1.0%-i rəy bildirməkdə çətinlik çəkib.

Respondentlərin 70.5%-i peşə təhsilinin iş tapmağı əlçatan etdiyini, 26.1% əlçatan etmədiyini bildirib. Onların 3.4%-i rəy bildirməkdə çətinlik çəkib.
Bununla belə, respondentlərin 40.8%-i peşə təhsilinin ali təhsillə müqayisədə daha çox iş imkanları yaratdığını, 55.4%-i yaratmadığını bildirib. 3.8%-i bu barədə rəy bildirməyib.

Sorğu iştirakçılarının əksəriyyəti - 93.8%-i orta məktəbdə zəif oxuyan şagirdlərin peşə təhsil müəssisələrinə cəlb edilməsinin vacib olduğunu qeyd edib. Sorğu iştirakçılarının cəmi 5.6%-i isə buna ehtiyac olmadığı qənaətini bölüşüb, 0.6%-i bu barədə rəy bildirməkdə çətinlik çəkib.

Respondentlərin 79.3%-i peşə təhsilinin həm oğlanlar, həm də qızlar üçün eyni dərəcədə vacib olduğunu bildirib. Sorğu iştirakçılarının 12.4%-i peşə təhsilinin məhz oğlanlar, 8.3%-isə məhz qızlar üçün daha vacib olduğunu ifadə edib.