\"ABŞ Avropanın iqtisadiyyatını dağıdır\"

Bu gün Ukraynaya səfər edən ABŞ-ın vitse-prezidenti Co Bayden bildirib ki, Rusiyaya qarşı sanksiyalar davam edəcək

Co Baydenin sözlərinə görə, dünya liderləri qərara gəliblər ki, Rusiyaya qarşı sanksiyalar Minsk razılaşmasının müddəaları tam yerinə yetirilməyincə, Ukraynanın ərazi bütövlüyü tam bərpa edilməyincə qüvvədə qalacaq.

Politoloqlar isə iddia edir ki, bu qərar Rusiyanı çökürtmək məqsədi daşıyır.

Co Baydenin fikrini millət vəkili Araz Əlizadə Ölkə.Az-a şərh edib:

"Burada söhbət Rusiyanın çökməsindən getmir. ABŞ Avropanın iqtisadiyyatını dağıdır. Avropa iqtisadiyyatı çökdükdən sonra yenidən dirçəlməsi uzun zaman alacaq və Avropa iqtisadiyyatı ABŞ iqtisadiyyatı ilə rəqabət apara bilməyəcək. ABŞ siyasətşünasları son 20 ildə olduğu kimi yenə də uduzurlar. Məsələ ondadır ki, ABŞ iqtisadiyyatına artıq Avropa iqtisadiyyatı deyil, Asiya iqtisadiyyatı rəqibdir, xüsusən də Çin, Rusiya, Hindistan. Ancaq ABŞ Avropanın elmi iqtisadi potensialını nəzərə alaraq bu sanksiyalar vasitəsi ilə Avropa iqtisadiyyatını dağıtmaqda davam edir".

Qeyd edək ki, ABŞ və Qərbin Rusiyaya tətbiq etdiyi iqtisadi sanksiyalara Türkiyə qoşulmamışdır. Son olaylardan sonra isə Rusiya Türkiyəyə iqtisadi sanksiyalar tətbiq edib. Türkiyənin isə ABŞ və Qərbin Rusiyaya qarşı tətbiq etdiyi iqtisadi sanksiyalara qoşulması sual altındadır.

Səxavət Məmməd
Ölkə.Az