Üzeyir Cəfərov: "NATO Türkiyəni istənilən halda dəstəkləyəcək"

ABŞ-dan Türkiyəyə hərbi dəstək gəldi

ABŞ Türkiyənin Suriya sərhədində nəzarət uçuşları üçün 6 ədəd F-15C qırıcısı göndərib. Bundan əlavə Rusiyanın Türkiyəni təhdid etməsi artıq NATO-nun gündəmindədir. ABŞ gələcəkdə Türkiyəyə yeni istahsal etdiyi F-35 tipli dünyada analoqu olmayan qırıcı-bombardmançı təyyarələr də satacaq.

ABŞ-ın Türkiyəyə hərbi yardımını hərbi ekspert Üzeyir Cəfərov Ölkə.Az-a şərh edib:

"Başqa cür olsa idi təəccüblənərdim. NATO-nun Türkiyənin yanında olması təkcə sözdə deyil, əməldə olması ilə də göstərilməlidir. NATO artıq bu addımları atır. Türkiyə onsuz da təkbaşına bu məsələlərlə üzləşməyə hazır idi. İndiyə qədər NATO yox idi, amma Türkiyə PKK ilə mübarizə aparırdı. Gördüyümüz kimi vəziyyət bir qədər dəyişib. Dəyişikliyin də əsas səbəbkarı Rusiyadır. ABŞ-ın Türkiyəyə dəstəyi Rusiyanın qırmızı xətti keçməməsi üçün edilməli idi və edilir də. NATO heç vaxt Türkiyəni tək buraxmamışdı. Rusiya son zamanlar atom silahlarını hərəkətə gətirmək barədə danışır. Rusiyanın müdafiə naziri bildirdi ki, 95% strateji nüvə silahları hazır vəziyyətə gətirilib. Rusiya bu məsələdə bir qədər sakitləşməlidir. Rusiya istəyir ki, hər vasitə ilə istədiyinə nail olsun, ancaq Türkiyə bununla heç vaxt barışmayacaq. Dünən Türkiyənin xarici işlər naziri Mövlud Çavuşoğlu açıqlamasında bildirdi ki, biz kifayət qədər səbr, dözüm nümayiş etdiririk, ancaq Rusiya belə davam edəcəksə, bizim səbrimiz sonsuz deyil, Türkiyə tərəfindən çox sərt addımlar atılacaq".

Səxavət Məmməd
Ölkə.Az