Müğənnilər vergidən yayına bilməyəcəklər

Gəlirlərə mütənasib vergilər ödənilməlidir. Bunun üçün isə ən önəmli şərt gəlirlərin və xərclərin şəffaf uçotunun aparılmasıdır.

Bizim şou-biznes nümayəndələrinin əldə etdiyi gəlir və xərclərinin uçotu yoxdur. Onların bəziləri obyektiv, bəziləri isə subyektiv səbəblərdən bizə öz gəlir və xərclərinin uçotunu təqdim etməyə həvəsli deyillər, təqdim etmirlər.

Ölkə.Az xəbər verir ki, bu sözləri bu gün təşkil edilən mətbuat konfransında Vergilər nazirinin birinci müavini Natiq Əmirov deyib.

“Biz bu insanların gəlirlərini nəzarətə götürə bilərik, ən azından toyları müşahidəyə götürə bilərik. Vergilər Nazirliyinin imkanı var ki, konkret bir musiqiçini nəzarətə götürsün və onun bütün gəlirlərini hesablasın. Bu məsələni ictimaiyyətdə çıxaraq, müzakirə edək və bu adama vergi hesablayaq. Amma bu, ədalətli olacaqmı?”, - deyə nazirin birinci müavini qeyd edib.

Biz bu vergilərin gəlirlər üzərindən hesablanmasına gedə bilmirik, çünki kimin harda çalışmağından asılı olmayaraq, onlar da bizim vətəndaşlarımızdır. Biz kütləvi şəkildə o vergilərin hesablanmasına başlasaq, 3 aydan sonra yığışsaq, siz bu sualı verəcəksiniz ki, bu nə qədər doğrudur? Niyə başqasına az, başqasına isə daha çox vergi hesablanıb?”.

N.Əmirov təklif edib ki, gəlir və xərclərimizin həcmini şəffaflaşdırmalıyıq:

“Biz gəlir və xərclərimizi şəffaflaşdıraq, bir-birimizə, vergi orqanlarına kömək etmiş olarıq. Biz təkliflərimizi veririk. Bu sonda bir nəticə verməsə, biz mənzillərə kvadratmetrinə görə vergi tətbiq etdiyimiz kimi onlar üçün bir mexanizm fikirləşib tapacağıq. Bu isə ədalətli olmaya bilər, amma ən azından hamı üçün şəffaf olacaq. Onlar bu vergini ödəməli olacaqlar”, - deyə o deyib.(oxu.az)

Ölkə.Az