Ban Ki-mun Leonardo di Kaprio ilə görüşdü

Bir neçə gün əvvəl Hollivud ulduzu Leonardo di Kaprionun təbiətin mühafizəsi sahəsində gördüyü işlərə görə BMT-nin iqlim problemləri üzrə sülhməramlı səfiri təyin edildiyi açıqlanmışdı. Ötən gün isə BMT-nin Baş katibi Ban Ki-mun Leonardo di Kaprio ilə görüşüb. Görüş zamanı Ban Ki-mun di Kaprioya sentyabrın 23-də BMT-də keçiriləcək İqlim Sammitində çıxış etməyi təklif edib. Hollivud ulduzu isə ona həvalə edilən sülhməramlı səfir vəzifəsinin elə də asan olmadığını vurğulayıb.

«Bu, heç də asan vəzifə deyil, biz daha böyük bir hərəkata qoşulmağa hazırlaşırıq. Hər ötən gün sürətli iqlim dəyişikliyi barədə xəbərlər eşidirik. Bununla bağlı narahatlıq keçirən bir vətəndaş kimi bu mühüm əhəmiyyətli vəzifənin öhdəsindən şərəflə gələcəyimə ümid edirəm.» - deyə, Hollivud ulduzu bildirib.

38 yaşlı aktyor uzun illərdir təbiətin mühafizəsi sahəsində mühüm işlər görür. Ötən ilin noyabrında Leonardo di Kaprio Nepaldakı pələnglərin mühafizəsi və nəslinin artırılması üçün Ümumdünya Vəhşi Təbiət Fonduna 3 milyon dollar bəxşiş vermişdi. Di Kaprio hələ 1998-ci ildə təbiətin mühafizəsi istiqamətində qrantların verilməsi üçün öz adına fond da təsis etmişdi./Anspress/

Ölkə.Az