\"Rusiya yaxşı bilməlidir ki, biz Ermənistan kimi fürsətçi deyilik\"

Rusiya-Türkiyə gərginliyi Qarabağ məsələsinə də sıçradı

Əhməd Davudoğlu Bakıya səfəri zamanı bəyan etmişdi ki, Ankara işğal edilmiş ərazilərin Azərbaycana qaytarılması üçün əlindən gələni edəcək. Buna qarşılıq olaraq Rusiyanın ATƏT yanında daimi nümayəndəsi Aleksandr Lukaşeviç bildirib ki, Dağlıq Qarabağ münaqişəsində tərəflərdən birini müdafiə etmək cəhdi destruktivdir və bunun heç bir davamı ola bilməz.

Baş verən prosesləri millət vəkili Zahid Oruc Ölkə.Az-a şərh edib:

"Rusiyanın siyasi dairələrində hərbi təyyarənin vurulmasından sonra Türkiyə əleyhinə böyük bir kampaniya aparıldı. Bu kampaniyada şovinizim elementləri yetərincə çox idi. Jirnoviskinin dilindən İstanbulu az qala su altında qoyacaq raket zərbələrini Ağ dənizə vurmaqla Ağ dənizin kiçik bir hissələrini digər məkanlarla qovuşdurmaq və beləliklə məlum problemi "ortadan qaldırmaq" təklif edilmişdir. Bəziləri isə real olaraq PKK-nı daha açıq şəkildə silahlandıraraq Türkiyə əleyhinə separatizmin dərinləşməysinin zəruri olduğunu elan etmişdilər. Bir qrup isə Qərblə Türkiyə arasındakı münasibəti nəzərə alıb sırf Ərdoğan əleyhinə daxildəki qüvvələri maliyələşdirməklə Türkiyənin siyasi həyatına müdaxilə etmək kimi planlar təklif edirdilər. Ancaq Ermənistan amilindən istifadə etmək istəyənlər çox idi. Onlar bildirirdilər ki, 100 il öncə ermənilərə qarşı "soyqırım" baş verib. Buna görə Türkiyə cavab verməlidir. Ermənilərin o zaman yaşadığı ərazi onların özlərinə qaytarılamalıdır. Bu siyasi cavabdehlik torpaqların qaytarılması ilə bərabər eyni zamanda təkcə Ermənistanı Türkiyənin üzərinə qaldırmaq deyil, həm də Azərbaycan əleyhinə bundan istifadə etmək istəyənlər çox idi. Həttə qeyd etmişdilər ki, Türkiyə ilə Rusiya arasında real hərbi əməliyyatlar baş verərsə ermənilər də Türkiyə əleyhinə vuruşacaqlar. Rusiyanın siyasi dairələri belə hesab edirlər ki, məlum hadisədən sonra Türkiyənin Cənubi Qafqazdakı maraqlarına mütləq zərbə vurmaq lazımdır. Onlar ehtiyatlanırlar ki, Qərb Rusiyaya qarşı yeni bər cəbhə açar. Hətta ermənilərin bütün mediasında isterika var ki, Qarabağda əməliyyatlar o qədər dərinləşə bilər ki, Qarabağdakı proseslər də qızışa və real müharibəyə keçə bilər.

Türkiyənin Qarabağ məsələsində Azərbaycanı müdafiə etməsi bu problemə birtərəfli qaydada yanaşması deməkdir. "Türkiyənin buna ixtiyarı yoxdur. Ermənistan amilini nəzərə almadan birtərəfli qaydada Azərbaycanı müdafiə etmək yalnışdır" kimi deyilənlər heç də ciddi arqumentlərə dayanmayan mövqelərdir. Açıq demək lazımdır ki, burada başqa bir tendensiya da var. Yəni Türkiyə Azərbaycanın problemləri ilə silahlanaraq həqiqətənmi Rusiya ilə savaşda bizim ölkəmizdən istifadə edir? Hətta Rusiyanın neytral ekspertlərinin dilindən bunun səsləndiyini eşidəndə bu sualın üzərində düşünməli olursan. Gerçəkdən 100 il əvvəldə olduğu kimi Azərbaycan Lenin-Atatürk münasibətlərinə bir detal kimi çıxır, sonra da qapanır və bu bizim ziyanımıza olan hadisələrlə müşaiyət olunur. Azərbaycan bu dönəmdə Türkiyə ilə birləşib Ermənistan əleyhinə böyük təxribatçı proseslər aparmaq niyyətindədir? Rusiyanın başının qarışdığını düşünərək həm iqtisadi, həm də tranzit, həm də hərbi cəbhədə fəal hərəkətlənmələr gedəcək? Bu yoxdur ortada. Dəqiq məsələnin mahiyyəti ondan ibarətdir ki, Türkiyə Azərbaycan amilindən nə qədər danışsa da, Qarabağ problemindən bəhs etsə də, bizi heç zaman ortada bir qurbanlıq dövlət kimi seçmir. Türkiyə hər hansısa bir şəkildə Rusiya ilə savaşda bizim əzilməyimizi qətiyyən istəmir. Üzərimizə başqa bir öhdəliklər qoymayıb. Etiraf edək ki, bizim mediada da təxribat elementləri kifayət qədər çoxdur. Yəni, "Türkiyə Qarabağa girəcək, bu gün, sabah müharibə başlanır, türk ordusu Qarabağa yeriyəcək" və.s kimi fikirlər əslində bizi qədərindən artıq hədəfə çevirməkdədəir. Gördüyümüz kimi ölkə rəhbəri kifayət qədər ehtiyatlı, hesablanış bir mövqe ortaya qoyub. Biz münasibətlərin normallaşması yönündə addımlar atırıq. Ermənistanda yaşayan milliyətcə talış olan ancaq əslində erməniçilikdən daha önə keçən Fəxrəddin Abbaszadə və digərlərinin əli ilə bizim ölkəmizin də Rusiyaya arxadan zərbə vurduğunu və gizli oyunlara qoşulduğunu, Rusiyanın zəiflədilməsi üçün siyasi, iqtisadi diversiyalara qatıldığını iddia edən mövqelər gündəmə gətirilir. Guya ki, biz yaranmış şəraitdən maksimum dərəcədə öz maraqlarımız üçün istifadə etmək naminə vəziyyəti daha da dərinləşdiririk. Halbuki belə deyil, əksinə Ermənistan bu mövqedədir. Azərbaycan özünün xarici siyasət hədəflərini yaxşı hesablayır.

Tarix ərzində Türkiyə ilə Rusiya arasanında baş verən ən azı 12 müharibənin hamısında biz ziyan çəkmişik. Faktiki olaraq bunun bizə faydası yoxdur. Rusiya Türkiyə münasibətlərinin müharibə səviyyəsinə qalxmasını istəmirik. Biz Ermənistan kimi fürsətçi deyilik. Bunu Rusiyanın siyasiləri, parlamentariləri də yaxşı bilməlidir".

Səxavət Məmməd
Ölkə.Az