MTN-in keçmiş əməkdaşı: Eldar Mahmudova görə cəmiyyətdə MTN-ə qarşı \"allergiya\" yaranmışdı

MTN-nin iki xüsusi xidmət orqanına bölünməsi cəmiyyətdə birmənalı qarşılanmadı.

Bəziləri bunu düzgün addım, bəziləri isə gecikmiş addım hesab etdilər.

MTN-nin kəşfiyyat və əks kəşfiyyata ayrılması barədə verilmiş qərarı MTN-nin keçmiş əməkdaşı İlham İsmayıl Ölkə.Az-a verdiyi açıqlamasında şərh edib:

"Ad şərtidir. Nazirlik qoyan da var, xidmət qoyan da var. ABŞ-da xarici kəşfiyyatın adı Mərkəzi Kəşfiyyat İdarəsi gedir, daxili kəşfiyyat Federal Təhqiqat Bürosu gedir. Kəşfiyyat orqanı Rusiyada xidmətdir. Vaxtı ilə Dövlət Təhlükəsizlik Komitəsi olub, sonradan nazirlik olub və.s.

Burada əsas məsələ ad yox, orqanın təhlükəsizliklə məşğul olmasıdır. Xidmət elə böyük ola bilər ki, nazirlik statusundan da böyük olar. Əsas odur ki, kəşfiyyat və əks-kəşfiyyat ayrılıb. Əksər dövlətlərdə olduğu kimi kəşfiyyata müstəqillik verilib. Bizdə demək olar ki, heç vaxt bu qurumlar ayrı olmamışdır. Bizdə kəşfiyyat və əks-kəşfiyyat həmişə bir yerdə olub. Lap elə 1920-ci ildən bəri. Azərbaycanın coğrafi mövqeyi, əməliyyat şəraiti, ətrafımız, qonşular, torpaqlarımızın işğalı onu tələb edir ki, kəşfiyyat müstəqil olsun. Müstəqil mənbələrdən kəşfiyyat xəbərləri gəlsin. Ən əsası isə peşəkar kadrlar yetişsin. Artıq kəşfiyyatdan əks-kəşfiyyata keçid olmayacaq. Peşəkar kəşfiyyatçılar yetişəcək. Bunun üçün Akademiyanın fəalıiyyətinə və oradakı tədris sisteminə də lazımi dəyişikliklər ediləcək. Hesab edirəm ki, xüsusi xidmət orqanlarında keçirilən bu struktur dəyişiklikləri uğurlu bir addım və düzgün verilmiş qərardır.

Düşünürəm ki, Akademiyanı iki yerə bölməyə ehtiyac qalmayacaq. Akademiyanın nəzdində ola bilsin bir kurs və ya fakultə yaradılsın. Bu qərardan sonra keçmiş MTN-də qarşıdurma deyilən bir şey olmayacaq. Əksinə kəşfiyyatla əks-kəşfiyyat çox vaxt işlərini koordinasiyalı şəkildə görəcəklər. Kəşfiyyatla əks-kəşfiyyatın ayrılması xüsusi xidmət orqanlarının işini daha effektli edəcək.

Bildiyimiz kimi son prosseslərdən sonra Eldar Mahmudov və onun dəstəsinə görə MTN-ə qarşı cəmiyyətdə bir "allergiya" yaranmışdı. Ona görə də, adı və strukturu dəyişməkdə çox düzgün addım atıblar.

Səxavət Məmməd
Ölkə.Az