Əmisi qızının keçmiş ərini öldürən şəxs 16 il cəza aldı
Rüstəmov Fərəməzovu əmisi qızı barəsində nalayiq sözlər danışdığına görə öldürüb.
Bakı Ağır Cinayətlər Məhkəməsində Zərdab rayon sakini Elman Rüstəmovun (1987-ci il təv.) CM-nin 120.2.2 (xuliqanlıq niyyəti ilə qəsdən adam öldürmə) və 120.2.4-cü (xüsusi amansızlıqla qəsdən adam öldürmə) maddəsi ilə təqsirləndirilməsinə dair cinayət işi üzrə məhkəmə prosesinin baxışı yekunlaşıb.
Bu il martın 28-də Bakı-Aeroport magistral yolunun kənarındakı ağaclıq sahəsində Elman Rüstəmov münaqişə zəminində əmisi qızının keçmiş həyat yoldaşı Emin Fərəməzovu bıçaqlayaraq qətlə yetirib və hadisə yerindən uzaqlaşmaq istəyərkən
post-patrul xidmətinin əməkdaşları tərəfindən saxlanılıb.
Məlumat əsasında hadisə yerində Xəzər RPİ və rayon prokurorluğunun əməkdaşları ekspertin iştirakı ilə müayinə aparıblar.
İş üzrə istintaqda dindirilən Elman Rüstəmov Emin Fərəməzovu onun əmisi qızı barəsində nalayiq sözlər danışdığına görə öldürdüyünü bildirib.
Məhkəmə prosesində Rüstəmov mərhumun da Zərdab rayonundan olduğunu, yaşca ondan böyük olduğu üçün onunla yaxın münasibətləri olmadığını bildirib. 2000-ci ildə əmisi qızı Ayşən nişanlı ola-ola Eminə qoşulub qaçıb, amma 4-5 ildən sonra uşaqla ata evinə qayıdıb. Həmin ərəfələrdə eşitdiyinə görə, hansısa cinayətə görə Fərəməzovu polis tutub və o, məhkəmənin hökmü ilə həbs cəzası alıb. O, elə o vaxtlar fikirləşirdi ki, dayısının ailəsini biabır etdiyinə görə Emini öldürəcək, lakin sonralar o, bu hadisəni unutmağa çalışıb.
İllər keçəndən sonra, bu il martın 25-də Elmanın mobil telefonuna zəng edən naməlum şəxs özünü əmisi qızının əri kimi təqdim edərək, azadlıqda olduğunu deyib və onu kafeyə dəvət edib.
Orada olarkən yanlarında Eminin bir neçə tanışı da olub, sərxoş olan Fərəməzov söhbət əsnasında Ayşənlə yaşadığı və ayrıldığı vaxtlardan danışıb, bu isə Elmanın xoşuna gəlməyib. O, Eminə etirazını bildirəndə, sonuncu onun qabağında uşaq olduğunu söyləyib və onların söz-söhbətinə qarışmamağı tapşırıb. Yeyib-içməkdən sonra o sağollaşaraq, evə qayıdıb, ayrılarkən 3 gündən sonra görüşəcəkləri barədə razılaşıblar.
Eminin dediklərini özünə təhqir kimi qəbul edən Elman onu öldürmək qərarına gəlib. Martın 28-də Rüstəmov evdən mətbəx bıçağı götürərək avtobusla Mərdəkan qəsəbəsinə gəlib, Eminlə yol kənarında görüşərkən deyib ki, əmisinin ailəsini biabır etdiyi üçün, o ölməlidir. Sonra zərbələr vurmağa başlayıb, 3-cü yada 4-cü zərbədən sonra bıçağ əyilib.
Hadisə ani baş verib, sonra əlində bıçaqla yola çıxıb, bu zaman yanında post-patrul avtomaşını dayanıb. O, bıçağı yerə tullayıb və təslim olub. Yaralının dalınca təcili tibbi yardım maşını gəlib, onu isə Xəzər RPİ 1-ci polis bölməsinə aparıblar.
Elman Rüstəmov ittiham üzrə özünü qismən təqsirli hesab edərək, əməlindən peşman olduğunu bildirib, zərərçəkən Gülnar Fərəməzova isə məhkəmədən oğlunun qatilinə ağır cəza təyin olunmasını xahiş edib.
Məhkəmənin hökmü ilə təqsirləndirilən şəxs cəzasını ciddi-rejimli cəzaçəkmə müəssisəsində çəkməklə 16 il müddətinə azadlıqdan məhrumetmə cəzasına məhkum olunub.(oxu.az)
Ölkə.Az
