İran ÜTT-yə daxil olmaq istəyir

"İran Ümumdünya Ticarət Təşkilatına daxil olmaqla bağlı danışıqlar aparmağa hazırdır".

Ölkə.Az xəbər verir ki, bunu İranın sənaye naziri Rza Nemətzadə bəyan edib.

"İndi iki il danışıqlardan sonra nəhayət ki, İranın nüvə fəaliyyəti ətrafında bütün anlaşılmazlıqlar aydın olub və biz dünya iqtisadiyyatına inteqrasiya mərhələsinə keçirik", - deyə Nemətzadə Nayrobidə 162 ölkənin ticarət nazirlərin görüşündə bildirib.

Qeyd olunur ki, İranın iqtisadiyyatı ÜTT-yə daxil olmayan ən böyük iqtisadiyyatlardan biri sayılır.

Ümumdünya Ticarət Təşkilatı 1995-ci ildə Tariflər və Ticarət üzrə Baş Sazişin varisi kimi yaradılmış beynəlxalq təşkilatdır. ÜTT millətlər arasında ticarətin qlobal qaydalarını müəyyənləşdirən yeganə beynəlxalq qurumdur. Onun əsas funksiyası ticarətin tarazlı, maneəsiz, ehtimal olunan şəkildə və azad aparılmasını təmin etməkdir. Məqsəd üzv ölkələrin əhalisinin rifah halını yaxşılaşdırmaqdır. ÜTT çoxtərəfli ticarət sazişləri əsasında ölkələrarası ticarət münasibətlərinin tənzimlənməsini həyata keçirir. Təşkilat yeni olsa da, çoxtərəfli ticarət sistemi 1940-50-ci illərdən etibarən GATT çərçivəsində yaradılıb.

Rəşid Mustafazadə

Ölkə.Az