Şəhidimiz Xaçmazda dəfn olundu

Döyüş tapşırığını yerinə yetirərkən şəhid olan Azərbaycan ordusunun əsgəri Nurməmmədzadə İbrahim Əvəz oğlu dəfn olunub. 

Ölkə.Az Region TV-yə istinadən xəbər verir ki, şəhidin Azərbaycan bayrağına bükülən cənazəsi xidmət etdiyi hərbi hissənin əsgər və zabitlərinin müşayiəti ilə doğulduğu Xaçmaz rayonunun Xudat şəhərinə gətirilib. 

Dəfn mərasiminə rayon rəhbərliyi və ictimaiyyəti, eləcə də rayon sakinləri qatılıb. 

Cəhbənin Xocavənd istiqamətində şəhid olan 1997-cı il təvəllüdlü İbrahim Nurməmmədzadə bu ilin iyul ayında həqiqi hərbi xidmətə yola salınıb. Müdafiə Nazirliyindən verilən məlumata görə, dekabrın 19-u, gün ərzində Azərbaycan Silahlı Qüvvələrinin bölmələri müxtəlif istiqamətlərdə düşmənin təxribat törətmək cəhdlərinin qarşısını qətiyyətlə alaraq onun atəş nöqtələri və mövqelərinə müxtəlif çaplı silahlardan dəqiq zərbələr endiriblər. 

Düşmənlə döyüş toqquşmasında Azərbaycan Silahlı Qüvvələrinin hərbi qulluqçusu əsgər Nurməmmədzadə İbrahim Əvəz oğlu şəhid olub.

Şəhid  hərbi xidmət zamanı həlak olan  və dünyasını dəyişən hərbçilərin dəfn mərasiminin təşkili ilə bağlı xüsusi qaydalardan irəli gələn tələblərə uyğun dəfn olunub. Hərbi qarovul düzülərək havaya yaylım atəşi açılıb. 

Allah rəhmət eləsin!