Əhmədlidə dostunu öldürən şəxs 14 il cəza aldı
Qəmbərov dostunun ünvanına ana söyüşü işlədib.
Bakı Ağır Cinayətlər Məhkəməsində Bakı ş. sakini Vasif Məmmədovun CM-nin 120.1 (qəsdən adam öldürmə) və 228.4-cü (qanunsuz olaraq soyuq silahı əldə etmə, satma və ya gəzdirmə) maddələri ilə təqsirləndirilməsinə dair cinayət işi üzrə məhkəmə prosesinin baxışı yekunlaşıb.
Bu il avqustun 16-da Əhmədli qəsəbəsinin Sarayev küçəsində Xətai RPİ 34-cü polis bölməsinin əməkdaşları üzərində zorakılıq əlamətləri ilə naməlum kişi meyiti aşkar ediblər. Ətrafda damcıvarı şəklində qan ləkələrinin olması müəyyən edilib, ehtimal edilib ki, ölümündən az əvvəl onunla naməlum şəxs arasında əl-qol atmaqla mübahisə olub.
İlkin olaraq faktla əlaqədar rayon prokurorluğunda CM-nin 120.1-ci (qəsdən adam öldürmə) maddəsi ilə cinayət işi başlanıb, təyin olunan məhkəmə-tibbi ekspertizasının rəyinə görə, mərhumun ölümünə ağciyərlərinin zədələnməsindən inkişaf etmiş kəskin qanitirmə səbəb olub. İstintaq-əməliyyat yolu ilə səhərisi gün öldürülən şəxsin Suraxanı rayon sakini İmaməli Qəmbərov (1971-ci il təv.) olması müəyyən edilib.
Cinayət işinin istintaqı gedişatında mərhumun yaxın ətrafı araşdırılıb və ayın 18-də şübhəli şəxs qismində polis əməkdaşları tərəfindən şəhər sakini Vasif Məmmədov saxlanılıb. Dindirmə zamanı sonuncu dostu İmaməlini onun ünvanına ağır söyüşlər işlətdiyinə görə öldürdüyünü etiraf edib.
Məhkəmə prosesində V.Məmmədov ittiham üzrə özünü qismən təqsirli hesab edərək, cinayətin onun tərəfindən törədildiyini və hadisə baş verərkən yanlarında artıq heç kimin olmadığını qeyd edib. Həmin axşam onlar “Əhmədli” metrostansiyasının yaxınlığında fəaliyyət göstərən kafedə yemək yeyərkən 1 litr araq içiblər, təxminən saat 23 radələrində oradan çıxıblar. Onlar bir neçə il idi ki tanış idilər, aralarında dostluq münasibətləri olub.
Məmmədovun sözlərinə görə, o evə getməyə hazırlaşsa da, dostu evə getmək istəməyib və onu küçədə tək qoyub, çıxıb getməsini deyib. Lakin Vasif İmaməlini tək qoyub getmək istəməyib və onun əllərini buraraq, xeyli yolla apararaq başa salmağa çalışıb ki, artıq gecdir və evə getmək lazımdır.
Onun bu hərəkətindən hiddətlənən Qəmbərov ondan əllərini buraxmasını tələb edib və ünvanına ana söyüşü işlədib. Yaşayış binasına 150-200 metr qalmış Vasif İmaməlinin qollarını buraxıb və sonuncu onun üzərinə gələrək, əl-qol atmaqla söyüş söyməkdə davam edib.
Dostunun sərxoş hərəkətlərindən əsəbiləşən Məmmədov cibindən açılıb-qatlanan bıçağı çıxararaq Qəmbərova 2 zərbə vurub, sonuncu yerə yıxılaraq, zarımağa başlayıb. Vasif isə “bunu istəyirdin?” deyərək hadisə yerindən gedib. Onun fikrincə, onların “razborkasını” heç kim görməyib, çünki küçədə heç kim gözünə dəyməyib. Təqsirləndirilən şəxs əməlindən peşman olmadığını bildirib.
Zərərçəkmişin hüquqi varisi Vaqif Məmmədov ifadəsində göstərib ki, qardaşı özəl şirkətdə qaravolçu işləyib, valideynlərinin ölümündən sonra tək yaşayıb. Baş vermiş hadisə barədə ona avqustun 17-də polis bölməsindən məlumat veriblər, sonra ona məlum olub ki, qardaşını tanışı Vasif Məmmədov ona məlum olmayan səbəbə görə öldürüb.
Zərərçəkən məhkəmədən təqsirləndirilən şəxsə ittiham olunduğu maddələrin sanksiyası həddində cəza təyin edilməsini xahiş edib.
Məhkəmənin hökmü ilə V.Məmmədov cəzasını ciddi rejimli cəzaçəkmə müəssisəsində çəkməklə 14 il müddətinə azadlıqdan məhrumetmə cəzasına məhkum olunub. (oxu.az)
Ölkə.Az
