Gənclər Fondu gənclərə ayırılan vəsaitin məbləğini açıqladı

Azərbaycan Prezidenti yanında Gənclər Fondu fəaliyyət göstərdiyi 4 il ərzində gənclər tərəfindən təqdim olunan layihələrə 13 581 205 manat vəsait ayırıb.

Ölkə.az-ın məlumatına görə, bunu Gənclər Fondunun icraçı direktoru Fərhad Hacıyev bu gün Fondun fəaliyyəti ilə bağlı məlumat verərkən deyib.

Fərhad Hacıyev bildirib ki, Fond indiyə qədər 7 qrant müsabiqəsi keçirib. Müsabiqələr zamanı Fonda müxtəlif layihələrlə bağlı 5080 müraciət daxil olub və onlardan 2333-ü müsbət cavab alıb.

Onun sözlərinə görə, Gənclər Fondu fəaliyyət göstərdiyi müddətdə həmişə çalışıb ki, gənclərə daha yaxın olsun və onların elm, təhsil, mədəniyyət və digər sahələrə yönələn layihələrini yaxından dəstəkləsin. Fond həmişə çalışıb ki, gənclərin ölkədə gedən ictimai proseslərdəki rolunu artırsın:

"Gənclər Fondu çalışır ki, regionlardan olan istedadlı, perspektivli gənclərin layihələrini daha çox dəstəkləsin", deyə Fondun direktoru bildirib..

Ölkə.Az