“Sağlam Universiada”-ya start verildi

Tələbələr peyntbol, velosiped idmanı və atıcılıq üzrə yarışacaqlar

Ölkə.Az xəbər verir ki, Azərbaycan Respublikasının Prezidenti yanında Gənclər Fondunun VII qrant müsabiqəsi çərçivəsində maliyyələşdirdiyi, Azərbaycan Atıcılıq Federasiyası və Azərbaycan Velosiped İdmanı Federasiyasının təşkilatçı qismində iştirak etdiyi “Sağlam Universiada” layihəsinə start verilib. 

Layihə rəhbəri, gənc fəal Şəbnəm Məhərrəmovanın sözlərinə görə, layihənin əsas məqsədi gənclərin asudə vaxtının səmərəli təşkilinə dəstək, onlar arasında sağlam həyat tərzinin təbliği, bir sıra idman növlərinin geniş şəkildə yayımlanmasına təkan vermək, onlarda idmana maraq yaratmaqdır.

“Hal-hazırda istər ölkəmizdə keçirilən beynəlxalq yarışlarla, istər dövlətin idmançılarımıza göstərdiyi diqqət sayəsində idmanın təbliğatı geniş surətdə aparılır. İdmanın inkişafına daim diqqət yetirmiş öndərimiz Heydər Əliyev 1994-cü ilin 26 iyununda Gənclər və İdman Nazirliyinin yaradılması barədə mühüm dövlət sənədini imzalamaqla gənc respublikamızda gənclərə və idmançılara dövlətin qayğısının əsasını qoydu və bununla həm də ölkəmizin gələcəyi üçün potensial kadrlar yetişdirilməsində böyük bir addım atmış oldu.

Lakin yaradılmış idman infrastrukturlarına, şəraitə baxmayaraq gənclər arasında idmanın təbliğ edilməsinə hələ də ehtiyac var. Müxtəlif yaş qruplarından olan gənclər arasında aparılmış sorğular nəticəsində belə qənaətə gələ bilərik ki, gənclər hər idman növü ilə maraqlanmırlar. Habelə peyntbol, atıcılıq və velosiped idmanı, dağçılıq, səmti müəyyənetmə idman növləri kimi idman sahələri daha az kütlənin maraq dairəsindədir. Göstərdiyimiz faktor bir daha əsas verir ki, gənclər arasında idmanın, sağlam həyat tərzinin təbliğinə böyük zərurət yaranıb”, - deyə Məhərrəmova bildirib.

O qeyd edib ki, “Sağlam Universiada” layihəsi çərçivəsində Bakı şəhərində dekabr və yanvar aylarında müxtəlif universitetlərin tələbələri arasında peyntbol, velosiped idmanı və atıcılıq üzrə turnirlər təşkil olunacaq, bununla da bu idman növlərinin gənclər arasında daha da geniş yayılmasına təkan veriləcək.

Daha geniş məlumat layihənin “Facebook”dakı “Universiada” səhifəsində yerləşdiriləcək.

Ölkə.Az