“Brent” markalı neft bahalaşıb
"Ölkə.az" xəbər verir ki, Londonun “ICE Futures” birjasında “Brent” markalı neftin oktyabr müqavilələrinin dəyəri Bakı vaxtı ilə saat 18:59-a olan vəziyyətə görə 0,81 dollar (1,23 %) artaraq bir barelə görə 66,44 dollar olub.
Nyu-York əmtəə birjasında (NYMEX) sentyabr ayı üçün WTI markalı neftin fyuçersləri də 0,81 dollar (1,29 %) artaraq 63,46 dollar/barelə bərabər olub.
“ABŞ-Rusiya danışıqları ətrafındakı qeyri-müəyyənlik risk mükafatını artırmağa davam edir, çünki Rusiya neftinin alıcıları daha böyük iqtisadi təzyiqlə üzləşə bilərlər”, - “Rystad Energy” analitik qeydində bildirib.
Xatırladaq ki, Putinin Trampla görüşü cümə günü axşam Alyaskada baş tutacaq. ABŞ Prezidenti bu gün görüşün uğursuz başa çatma ehtimalını 25 % kimi qiymətləndirdiyini bildirib. Bundan əvvəl isə o, “Rusiya Ukraynada atəşkəslə razılaşmasa, çox ciddi nəticələrlə üzləşəcək” demişdi.
ABŞ-nin maliyyə naziri Skott Bessent isə söyləyib ki, sammit nəticəsiz qalarsa, Vaşinqton sanksiyalardan və ikinci dərəcəli tariflərdən istifadə edə bilər.
