\"Rusiya-Ermənistan hərbi birliyi Türkiyəyə qarşı yönəlib\"

"Rusiya və Ermənistanın Qafqazda yaradacağı Hava Hücumundan Müdafiə Sistemi Türkiyədən gələn təhlükədən qorunmaq üçündür".

APA-nın Moskva müxbirinin verdiyi məlumata görə, bunu Rusiya Hava Hücumundan Müdafiə Qoşunlarının keçmiş komandan müavini, general-leytenant Aleksandr Luzan deyib.

O bildirib ki, birgə hava hücumundan müdafiə sisteminin yaradılması Türkiyədə baş verən hadisələrlə əlaqədardır: "Bu gün aviasiya döyüş fəaliyyətində əsas rolu oynayır. Türkiyə NATO üzvüdür və bu ölkənin ərazisində təkcə özünün aviasiyası deyil, ABŞ Hərbi Hava Qüvvələrinin aviasiyası da yerləşir. Hava sərhədlərimizi qoruya biləcək daha ciddi sistem lazımdır. Bunun üçün isə güclərin birləşdirilməsi gərəkdir".

General Rusiya-Ermənistanın birləşmiş HHMS-nin yaradılmasının iki ölkənin coğrafi vəziyyəti baxımından çətin olduğunu da qeyd edib: "Çünki Rusiya ilə Ermənistanın arasında Gürcüstan yerləşir. Lakin vahid döyüş idarəçiliyi olan hava hücumundan müdafiə sistemi artıq nailiyyətdir. Bizim Ermənistanda hərbi bazamız var. Bu bazanı düşmənin aviasiyasından qorumaq lazımdır”.

A. Luzan onu da qeyd edib ki, Moskva və İrəvan tərəfindən birləmiş Hava Hücumundan Müdafiə Sisteminin yaradılması MDB-nin vahid hava hücumundan müdafiə sisteminin yaradılması istiqamətində atılmış addımdır.

Qeyd edək ki, dünən Rusiya və Ermənistan arasında hava hücumundan müdafiə sistemlərinin birləşdirilməsi haqqında müqavilə imzalanıb. Müqaviləni Rusiya müdafiə naziri Sergey Şoyqu ilə onun ermənistanlı həmkarı Seyran Ohanyan imzalayıblar.

Ölkə.Az