"Müxalifətin vahid siyasi düşərgəsi yaradılmalıdır"

Ölkədə iqtisadi böhranın yaşandığı bir vaxtda iqtidar-müxalifət dialoqu gündəmə gəlib.

Bəzi siyasi partiyalar iqtidar-müxalifət görüşünün olmasını istəsə də, bir neçə siyasi partiyalar var ki, dialoq üçün şərtlər irəli sürürlər.

Politoloq Qabil Hüseynli iqtidar-müxalifət dialoqu barədə fikirlərini Ölkə.Az-la bölüşüb:

"Müxalifət cəmiyyətin vacib atributudur. Düzdür, müxalifət Azərbaycanda çox zəifdir və ictimai proseslərə təsir imkanları xeyli zəifləyib. Bununla yanaşı düşünürəm ki, ölkənin indiki durumunda belə bir görüşlərin keçirilməsinə ehtiyac var. Ona görə ki, ölkənin indiki durumu ümummillidir. Burada iqtidarçılıq, müxalifətçilik etmək düzgün deyil. Bu məsələyə ümummilli kontekstdən yanaşmaq lazımdır.

Belə görüşlər cəmiyyətin legitimliyini möhkəmləndirir, xüsusilə ermənilərin son dövrlərdə atəşkəslə bağlı söylədikləri fonunda Azərbaycanın milli problemlərə münasibətdə yetkinliyinin formalaşdırılmasına böyük ehtiyac var.

Müxalifət hazırda pərakəndədir. Müxalifətin vahid siyasi düşərgəsi yaradılmalıdır və bundan sonra onlar iqtidarla danışığa getməli, dialoq məsələsini qaldırmalıdır. İndiki kimi pərəkəndə şəkildə iqtidar-müxalifət dialoqunu keçirmək mümkün olmayacaq".

Qeyd edək ki, yola salacağımız ildə iqtdar-müxalifət dialoqu keçirildi, ancaq bu dialoqlara özlərini əsl müxalifət adlandıran Müsavat və AXCP qatılmadılar.

Səxavət Məmməd
Ölkə.Az