Hollivud ulduzu BMT-nin səfiri oldu

İndiyədək bir neçə dəfə «Oskar» mükafatına namizəd olsa da, hələ də mükafatı ala bilməyən Hollivud ulduzu Leonardo di Kaprionun gördüyü işlər qiymətləndirilib

Amma kino sahəsində deyil, təbiətin mühafizəsi sahəsində. Belə ki, dünyaşöhrətli amerikalı aktyor BMT-nin planetdə iqlim problemləri üzrə sülhməramlı səfiri təyin olunub. 

Bunu jurnalistlərə BMT-nin Baş katibi Ban Ki-mun açıqlayıb. 

«Cənab Di Kaprio ətraf mühitin mühafizəsi ilə bağlı hərəkatda etimad qazanan söz sahibidir və onun bu vəzifəni gücləndirmək üçün əhəmiyyətli təcrübəsi var» - Ban Ki-mun Leonardo di Kaprio haqqında belə deyib. 

38 yaşlı aktyor sentyabrın 23-də Nyu-Yorkda BMT-nin iqlim dəyişikliyi problemlərinə həsr olunmuş sammitində də çıxış edəcək. 

Ötən ilin noyabrında Hollivud ulduzu Nepaldakı pələnglərin mühafizəsi və nəslinin artırılması üçün Ümumdünya Vəhşi Təbiət Fonduna 3 milyon dollar bəxşiş vermişdi. Di Kaprio hələ 1998-ci ildə təbiətin mühafizəsi istiqamətində qrantların verilməsi üçün öz adına fond da təsis etmişdi./Anspress/

Ölkə.Az