Davudoğlu: "Rusiya Suriya müxalifətinə zərbələr endirir"

"Rusiya əsasən Suriya müxalifətinə zərbələr endirir"

Ölkə.Az xəbər verir ki, bu fikirləri Türkiyənin baş naziri Əhməd Davudoğlu bəyan edib.

"Rusiya tərəfindən son zamanlar reallaşdırılan 4198 uçuşdan yalnız 191-i İŞİD terror təşkilatına qarşı yönəlib. Digər tərəflərin Suriyada iştirakı üçün yeganə əsas İŞİD-lə mübarizədir. Rusiya dinc müxalifətə zərbələr endirməkdən imtina etməlidir. Suriyada böhranın nizamlanması yalnız hakimiyyətin Əsəd yerinə qanuni hökumətə təhvil verilməsindən sonra baş verə bilər", - deyə nazir qeyd edib.

Bir müddət öncə Davudoğlu Bolqarıstana rəsmi səfəri zamanı Sofiyada çıxışı zamanı Türkiyə-Rusiya münasibətlərindən danışıb.

O bildirib ki, Türkiyə Rusiya ilə münasibətləri pisləşdirmək istəmir, çünki bu həm Qara Dəniz regionu, həm də qonşu bölgələrə və qlobal sülhə mənfi təsir göstərə bilər. Davudoğlu qeyd edib ki, Rusiyanın Su-24 bombardmançısının vurulması Türkiyənin öz hava məkanını qorumaq məcburiyyətindən baş verib.

Xatırladaq ki, noyabrın 24-də Türkiyə Hərbi Hava Qüvvələrinin qırıcısı Suriya ilə sərhəddə Rusiyaya məxsus bombardmançı təyyarəni vurub. Türkiyə tərəfi Su-24 təyyarəsinin sərhədi pozduğuna görə vurulduğunu bəyan edib.

Rusiya tərəfi isə təyyarənin Suriya ərazisində vurulduğunu iddia edir.

Rəşid Mustafazadə

Ölkə.Az