\"Rusiya Qafqazda sülhün bərqərar olunmasına ən böyük maneədir\"

“Rusiya Cənub hərbi dairəsi adı altında ilhaq etdiyi Abxaziya və Ermənistanda hərbi qüvvələrini artırmaqla Qafqazda sülhün və barışın əldə olunmasına mane olur”.

Bunu Ölkə.az-a hərbi-siyasi icmalçı, ehtiyatda olan zabit Ramil Məmmədli deyib.

O bildirib ki, bu günlərdə Rusiya Müdafiə Nazirliyi Cənub hərbi dairəsinə son 3 il ərzində 4,4 min yeni və modernləşdirilmiş təyyarə, helikopter, raket-artilleriya silahları, radioelektron mübarizə vasitələri və digər qurğularla təchiz etdiyinə dair açıqlama yayıb. Bu texnikanın bir hissəsi isə separatçı Abxaziya və işğalçı Ermənistandakı Rusiya hərbi birləşmələrinin istifadəsinə verilib. Bundan başqa Rusiya 2020-ci ilin sonuna qədər Cənub hərbi dairəsinin texnika və silah arsenalını 70-100 faiz arasında yeniləməyi də planlaşdırır.
R. Məmmədlinin sözlərinə görə, onsuzda vəziyyətin gərgin olduğu Cənubi Qafqazda bu, müsbət addım kimi dəyərləndirilə bilməz:

“Rusiyanın öz maraqları naminə bölgədəki işğalçı və separatçı qüvvələrlə hərbi-siyasi əməkdaşlığı, bu ölkəyə inam və etibarı daha da azaldır. Çünki digər tərəf olan, Azərbaycan və Gürcüstan bu silahların hərbi əməliyyatlar başlandığı təqdirdə ona qarşı yenə istifadə olunmayacağına əmin deyillər. Bu da istər-istəməz qorunma instinkti yaradır və rəsmi Bakı və Tiflis də silahlanma istiqamətində ciddi addımlar atmağa məcbur olur. Belə olan təqdirdə həm Azərbaycanın, həm də Gürcüstanın ərazi bütövlüyü təmin olunmur. Rusiyaya sığınan separatçı və işğalçı qüvvələr də sülhə yaxınlaşmaq istəmirlər. Əslində Rusiyanın bölgədə hərbi-siyasi varlığını təmin edən qüvvələr də həmin separatçı və işğalçı ölkələrdir”.

Hərbi ekspert onu da deyib ki, faktiki olaraq Qafqaz “barıt çəlləyi”nə bənzəyir. Hər 4 ölkə - Rusiya, Azərbaycan, Gürcüstan, Ermənistan hərbi potensialını artırmaqda davam edir:

“Təəssüf edirəm ki, Qərb, yəni ABŞ Qafqazdakı bu vəziyyətə açıq şəkildə reaksiya vermir. Hər kəsi öz adı ilə çağırmır. Diplomatik qaydalardan çıxış edərək, işğalçı Ermənistanla əlaqələri saxlamağa üstünlük verir. Digər tərəfdən isə dünyada haqqın carçısı kimi özünü təqdim edir. Bu ikili standartlar həm də Qafqazda silahlı qarşıdurmaların alovlanacağına rəvac verir”.

R. Məmmədli Kollektiv Təhlükəsizlik Müqaviləsi Təşkilatının (KTMT) baş katibi Nikolay Bordyujanın bir müddət əvvəl Dağlıq Qarabağ münaqişəsi ilə bağlı açıqlamasına da münasibət bildirib:

“KTMT baş katibi kimi Nikolay Bordyujanın müttəfiq respublikanı müdafiə etməsi anlaşılandır. Lakin Azərbaycan burada KTMT-yə rəqib qruplaşmanın üzvü deyil ki, həqiqəti gizlədərək, yerli-yersiz müttəfiqi müdafiə edəsən. Rəsmi Moskva da bilir ki, Ermənistan Dağlıq Qarabağ məsələsində nə qədər ədalətsiz mövqe tutub və faktiki olaraq işğalçılıq siyasətini davam etdirir. Bütün bunlardan sonra işğalçı ölkənin başçısı Serj Sarkisyanın KTMT-nın son iclasındakı ağlaşmasından qəhərlənərək, dolayısı ilə Azərbaycanı mövcud durumu gərginləşdirməkdə ittiham etməsi heç bir çərçivəyə sığmır. Təəssüf ki, KTMT timsalında ruslar hələ də erməni şüvənliyinə inanmaqda davam edirlər”.

Ölkə.az