İntiharın bir addımlığından qayıdanların ilginc hekayələri

 

Son günlər Türkiyə gündəminin ən səs-küylü olaylarından biri də prezident Rəcəb Tayyib Ərdoğanın bir gənci intihardan çəkindirməsi ilə bağlı oldu. Detalları yada salaq. Prezident İstanbulun Boğaziçi körpüsündən keçərkən bir nəfərin özünü körpüdən atmaq istədiyini görüb. O, maşın karvanını dayandıraraq intihar etmək istəyən şəxsin yanına çağırılmasını istəyib. Prezidentin mühafizə rəisi həmin şəxsə yaxınlaşıb, prezidentin onunla görüşmək istədiyini deyib.

 

Təxminən 5 dəqiqə sürən danışıqdan sonra mühafizə rəisi və polislər intihara cəhd edən şəxsi razı salaraq, prezidentin yanına gətiriblər. Qısa söhbətdən sonra həmin şəxs Ərdoğanın əlini öpərək fikrindən daşındığını deyib. Prezident isə onun problemlərinin həlli üçün lazımi şəxslərə göstəriş verib.

 

İntihar etmək istəyən şəxsin Siirt sakini Vəzir Çatraş olduğu açıqlanıb. İki uşaq atası olan Çatraş intihara ailədaxili problemlərə görə cəhd etdiyini söyləyib. 

 

“Ən möhtəşəm intihar yolu yaşamaqdır” - unudulmaz sitat

 

Çoxlarına görə, bu, öncədən planlaşdırılmış bir hekayədir. Amma bunun gerçək olduğunu düşünənlər də az deyil. Bununla belə, ortada bir intihar və ondan qurtulan insanın hekayəsi var. Son illər Azərbaycanda da intihar edən, buna cəhd edən insanlar çoxdur. Bir çoxları intihar edərkən Koroğlu körpüsünə çıxır, oradan istək və narazılıqlarını bildirirdilər. Hətta deputat Qənirə Paşayevanı yanına çağıranlar, ondan mədət umanlar da az deyildi. 

Fövqəladə Hallar Nazirliyi əməkdaşlarının xilasetmə əməliyyatlarını da unutmaq olmaz. Zaman-zaman yüksəkmərtəbəli binadan özünü atmaq istəyən qadınlar, kişilər və onların bu addımını qonşu evdən hansısa formada dəf edən FHN-çilər. “Yeni Müsavat” Ərdoğan nümunəsindən yola çıxaraq, bu günədək intihar etməyə hazırlaşan, amma bu cəhdi ya vəlvələdən, ya da zəlzələdən uğursuzluğa düçar olan insanlar barədə gəzişmə edib. Ortaya xeyli ilginc detallar çıxıb. 

 

Bir yazıçının avtobioqrafiyasındakı sözlər idi bunlar: “Dünyaya gəldim, öldüm, sevdim, öldüm, yaşadım, öldüm!” Yanıltmac təsiri bağışlayan söz ardıcıllığını diqqətlə oxuyanda nə demək istədiyi anlaşılır yazıçının. Həyatını möhtəşəm bir finalla qapatmaq istəyənlər üçün arayışlar bəlkə də uğurlu olmur. Ölüm gəlir və aparır vücudu. Və o, finalın sənə yaraşıb-yaraşmadığını çözməyə də vaxt qalmır.

 

Bir dəfə xarici mətbuatda dəfələrlə intihara əl atmış, amma hər dəfə bu cəhdləri uğursuzluqla nəticələnmiş birinin müsahibəsi yayımlanmışdı. “Ən möhtəşəm intihar yolu yaşamaqdır” deyirdi 61 yaşlı ahıl. Bu həyatın iyrəncliklərinə qatlanmaq, boğula-boğula nəfəs almaq, hər şeyə dözmək elə intiharların ən böyüyüymüş, ona görə... Ölümü xəyal edərək yaşamaq yaşayaraq intihar etməkmiş həm də... 

 

İndi isə artıq intihar etmək istəyənlərin, daha doğrusu, belə bir ehtimal yaşayanları birləşdirən internet saytları da var. Amerikada hətta intihara hazırlaşanlardan ibarət könüllülər dəstəsi yaradılıb. Onlar bir-birinə bu məsələdə mənəvi dəstək verir, həvəsləndirir, yeni intihar yolları ilə bağlı məlumatlandırırlar. Və təsadüfi deyil ki, həyatın firavan olduğu İngiltərədə bir ildə 60 000, ABŞ-da isə 200 000 insan intihara əl atır. Hər biri də fərqli-fərqli üsullarla. Sözü uzatmadan intihar yollarına keçək.

 

Eyni vaxtda bir neçə intihar üsulu və sonda...

 

İntihar yollarından bəhs edib, tarixə qızıl hərflərlə yazılmış bu olayın üstündən ötmək insafsızlıq olar. 1998-ci ildə Fransada bir nəfər intihar üçün bir neçə vasitədən eyni vaxtda istifadə edir: dənizin sahilindəki qayaya bağladığı kəndiri boğazına keçirir. Daha sonra zəhər içir, paltarına od vuraraq özünü uçuruma atır və atlanarkən də əlindəki tapança ilə başına atəş açır. Lakin güllə onun başına dəyməyib yan keçir və kəndiri qırır. İntiharçı dənizə düşür. Su yanan paltarlarını söndürür və eyni zamanda onu şoka salır. Şok nəticəsində intiharçı içdiyi zəhəri qaytarır. Bir balıqçı tərəfindən dənizdən çıxarılaraq xəstəxanaya yerləşdirilən həmin şəxs orada hipotermiyadan (bədən hərarətinin aşağı düşməsindən) dünyasını dəyişir.

500 manat ver, intihardan vaz keçim...

 

Bu ilin yay ayında elə qəzetimizin əməkdaşlarının gözü qarşısında qəribə bir intihar hadisəsi yaşanmışdı. Bakının Nizami rayonunda gənc qadın çoxmərtəbəli evin 5-ci mərtəbəsindən özünü atmağa çalışmışdı. Naməlum qadının R.Rüstəmov küçəsində intihar etmək istədiyi barədə məlumat FHN-ə saat 13.45-də daxil olmuş, hadisə yerinə gələn yanğınsöndürənlər qadının pəncərə məhəccərindən asılaraq qaldığını görmüşdülər.

 

FHN əməkdaşları 5-ci mərtəbəyə qalxsalar da mənzilin qapısı bağlı olmuşdu. Və nəticədə xilasetmə əməliyyatını qonşulardan biri etmişdi. O, qonşu eyvandan qadının yaşadığı evə keçərək qadını yuxarı qaldırmağa nail olmuşdu. Yanğınsöndürənlər intihara cəhd edən qadını təcili yardım əməkdaşlarına təhvil vermişdilər. Qadının həyat yoldaşı ilə aralarında ciddi problem olduğu və bunları çözə bilmədiyi üçün intihara əl atdığı sonradan məlum olmuşdu. 

Xaçmaz rayonunda intihara cəhd edən şəxs də xilas edilib. Xaçmaz rayon sakini Ələkbərov Əbülfət Nöhbala oğlu intihar etmək məqsədilə Xaçmaz dəmir yolu vağzalının işıqlandırma dirəyinə çıxıb. Hadisə yerinə FHN-in xilasediciləri və hüquq-mühafizə orqanlarının əməkdaşları cəlb olunub. İntihar etmək istəyən şəxs hədələyib ki, kimsə dirəyə çıxmaq istəsə, özünü yandıracaq. O, hadisə yerinə gələn ailə üzvlərinin də yalvarışlarına məhəl qoymayıb.

 

Əbülfət Ələkbərov intihardan vaz keçmək üçün 500 dollar pul istəyib. İstədiyi pul verilib. Amma, o, pulu yenidən yerə atıb. Fürsətdən istifadə edərək onun ayağından tutan xilasedicilər Əbülfət Ələkbərovu xilas ediblər.

 

İp qırıldı, intihar baş tutmadı... 

 

Türkiyə nümunələrinə də diqqət edək. Qonşu ölkənin Kayseri şəhərindəki Yüreğil kəndində 19 yaşlı Z.Ç tövlədə intihar etmək istəyərkən özünü asdığı ipin sürüşməsi nəticəsində qurtulub. İntiharın səbəbi gənc qızın valideynləri ilə mübahisə etməsi olub. Onun intihara cəhd etdiyi məkan isə bir qohumuna məxsus tövlə olub. 

 

Latviyanın paytaxtı Riqada isə bir gənc dəmiryolunda intihara cəhd edib. Özünü relslərin üzərinə atmaq istəyən gənci ətrafdakılar dilə tutaraq bu addımndan vaz keçirməyə çalışsalar da, son anda qatar onun ölümünə səbəb olub. Bu olay isə dəmiryolundakı təhlükəsizlik kameralarının yaddaşında yer alıb. Görüntülərə görə, Kaluzko-Rigaa adlı 25 yaşlı teatr tələbəsi intihar etmək məqsədilə qatar stansiyasının platformasından relslərin üzərinə hoppanıb. Amma bu arada ətrafdakı insanlar onu dilə tutub və sonda nail olublar. Fikrini dəyişən gənc platformaya dırmaşanda sürətlə gələn qatar onun ölümünə səbəb olub. Gənc qatarla platforma arasında qalaraq faciəvi şəkildə dünyasını dəyişib. 

 

Türkiyənin İzmir şəhərində 31 yaşlı T.K. evlərinin dəmir balkonuna bağladığı iplə özünü asaraq intihar etmək istəyib. Vəziyyətin fərqinə varan qonşular öncə evin qapısını qıraraq içəri girib. Psixoloji problemləri olan T.K-nı xilas etməyə çalışan qonşuları mətbəxdən götürdükləri bıçaqla ipi kəsiblər. Amma nə olubsa bundan sonra olub: gənc üçüncü mərtəbədən yerə düşüb və şikəst olub. (musavat.com)