“Xərclərimizi və imkanlarımızı nəzərdən keçirməliyik”
"2015-ci ilin ümumilikdə ölkəmiz üçün uğurlu olduğu qənaətindəyəm. Azərbaycan ilk Avropa Oyunlarını yüksək səviyyədə keçirdi, möhtəşəm keçirilən bu tədbir ölkəmizin dünyadakı nüfuzunun artması üçün növbəti addım oldu".
Ölkə.Az xəbər verir ki, bunu moderator.az açıqlamasında sabiq millət vəkili Gülər Əhmədova bildirib.
Gülər Əhmədova bildirib ki, oğlu da Avropa Oyunlarında könüllü kimi iştirak edib, bunu da özü üçün 2015-ci ilin ən yaddaqalan hadisələrindən biri sayır.
Sabiq millət vəkili bu il keçirilən parlament seçkisini də Azərbaycanın nüfuzunun artması baxımından əhəmiyyətli hadisə kimi qiymətləndirib:
"Parlament seçkisi azad, şəffaf, demokratik şəraitdə keçdi. Böyük uğurla başa çatdı. Seçkini izləyən beynəxalq müşahidəçilər də seçkinin beynəlxalq standartlara uyğun keçdiyini təsdiqlədilər. Düşünürəm ki, parlament seçkisi Azərbaycanın demokratik inkişafa doğru növbəti uğurlu addımı oldu. Eyni zamanda Azərbaycanın beynəlxalq nüfuzuna müsbət təsir göstərdi. Parlament üzvlərinə növbəti ildə daha böyük uğurlar arzulayırıq".
Gülər Əhmədova qeyd edib ki, bu il dünyada neftin qiymətinin düşməsi, böyük dövlətlərin apardığı siyasət bizim ölkəyə də təsirsiz ötüşməyib:
"Azərbaycan hökuməti son ana kimi əhalinin maraqlarının qorunması üçün bütün addımları atdı, dirəniş göstərdi. Lakin buna baxmayaraq bütün dövlətləri, hətta Çin kimi iqtisadi nəhəngi ağuşuna almış devalvasiya bizim üçün müəyyən çətinliklər yaratdı. Bu ümumi bəlanın qarşısını almaq, təsirini zəiflətmək üçün dövlətimiz gərəkən addımları atır. Bizim isə vətəndaş olaraq borcumuz bu məsələlərdə panikaya qapılmamaq, bütün xərclərimizi və imkanlarımızı yenidən nəzərdən keçirməkdir. Çətin vəziyyətdə olan xəstə, əlil, qoca, imkansız ailələrlə yardımlaşmalıyıq. İnsanlıq və islami fəlsəfəmizə söykənərək çətin dövrlərdə millət olaraq bütünləşməli, mənəvi dəyərlərimizi maddiyyata qurban verməməliyik. İnanıram ki, bu sınaqdan daha da mətinləşmiş, dövlət və xalq olaraq bir yumruq kimi uğurla çıxacağıq. Biz "Qonşu ac ikən evində rahat yatma fəlsəfəsi ilə yaşayan toplumuq. Allah birliyimizi pozmasın!"
Gülər Əhmədova Binəqədi rayonu ərazisində baş vermiş yanğını və Xəzər dənizində baş vermiş faciəni xatırladaraq həlak olmuş şəxslərin əzizlərinə, yaxınlarına səbr diləyib:
"Dünyadan köçənlərin ailəsinə, yaxınlarına başsağlığı verir, səbr diləyirəm. Növbəti ildə onların evlərinə ancaq xoş xəbərlər gəlsin. Bu hadisələr zamanı Fövqəladə Hallar Nazirliyi, Daxili İşlər Nazirliyi əməkdaşlarının göstərdiyi fədakarlıq xüsusi qeyd edilməlidir. Onu da vurğulamaq lazımdır ki, SOCAR rəhbərliyi sonuncu hadisənin fəsadlarının aradan qaldırılması üçün xüsusi səy göstərdi. Həmrəylik günü ərəfəsində bir məqamı deyim: Xalqımız bu ağır günlərdə çox böyük həmrəylik nümayiş etdirdi".
Ölkə.Az
