Avropada yeni dövlət iddiası

Bölgənin İtaliyadan ayrılmasını müdafiə edən Azad Cənubi Tirol Partiyasının lideri Eva Klotz verdiyi açıqlamada bölgənin İtaliyaya aid olmadığını, bu ölkənin işğalçı olduğunu və buna görə azad olmaq haqlarının olduğunu bildirib.

O, ötən il keçirilən sorğu zamanı 60 min əhalinin 90 faizinin müstəqil olmaq istədiyinini qeyd edib:

“Birinci Dünya müharibəsindən sonra torpaqlarımız İtaliya tərəfindən işğal olundu. O zaman əhalinin 90 faizi alman, 1 faizi isə italyan dilində danışırdı. Bu gün isə xalqın 70 faizi alman dilində danışır. İtaliya hələ də muxtar vilayət olmağımıza baxmayaraq Cənubi Tirolluları assimilyasiya etməyə çalışır. Cənubi Tirol İtaliya deyil və əsla olmayacaq”.

Xatırladaq ki, Avstriyanın Tirol əyaləti Birinci Dünya müharibəsindən sonra imzalanan razılaşmaya görə, ikiyə bölündü və bu gün Cənubi Tirol adlanan ərazi İtaliyaya verildi. İtaliyanın faşist lideri Mussolininin dövründə bölgədə yaşayan əhali zorla italyanlaşdırılırdı. Bu səbəbdən əraziyə minlərlə italyan köçürüldü, məktəblər və ictimai yerlərdə italyanca danışmaq tələb olundu.

Assimilyasiya siyasətinə qarşı aparılan uzun mübarizələr və qiyamlar nəticəsində bölgədə avtonom quruluş yaradıldı. Əhalisinin təxminən 70 faizi almanca danışan Cənubi Tirol 1992-ci ildən bəri muxtar bölgə kimi idarə olunur. (axar.az)