PKK Türkiyəyә qarşı savaşı böyüdür

 

Türkiyənin Cənub-Şərqində ötən ilin sentyabrında başlayan antiterror əməliyyatları günü gündən daha da genişlənir. Ordu və polis xüsusi təyinatlıları Diyarbəkr, Şırnak vilayətlərində PKK-nın möhkəmləndiyi bölgələrdə təmizləmə əməliyyatları aparır. Hərbi əməliyyatlar xüsusən də Diyarbəkrin Sur, eləcə də Şırnakın Cizrə və Silopi rayonlarında çox şiddətlə davam edir. 

 

Bölgədən gələn xəbərlər, mediaya sızan fotolar bölgədə ciddi döyüşlərin getdiyini, PKK yaraqlılarının hökumət qüvvələrinə ciddi müqavimət göstərdiyini ortaya qoyur. Əməliyyatlar xüsusən də ötən ilin dekabrından şiddətlənib, bölgəyə ardıcıl olaraq ordu birlikləri yeridilir. Son məlumata görə, bu günə qədər əməliyyatlarda 173 PKK terrorçusu öldürülüb. 

Ancaq hökumət qüvvələri və mülki insanlar da hәlak olur. Diyarbəkrdə tarixi bölgələr, böyük ərazidə yaşayış evləri artıq yararsız hala gətirilib. Bir sıra müşahidəçilərə görə, hökumət atəşkəs dönəmində dağlardan kürd bölgələrindəki şəhərlərə enən və şəhərlərdə möhkəmlənən PKK terrorunu təmizləməyə çalışır. Çünki PKK-nın şəhərlərdə möhkəmlənməsi və hətta artıq bir sıra cənub-şərq vilayətlərində şəhərlərdə faktiki olaraq hakimiyyəti əvəz etmәyә başlaması ilə bağlı məlumatlar vardır.  Silahlıların şəhərlərə sahib olması bölgəyә kontrolun itirilməsi anlamına gəlir. 

 

Lakin əməliyyatların bu şəkildə böyüməkdə olması, çoxlu sayda ordu, polis və hərbi texnikanın cəlb olunmasına baxmayaraq şəhərlərdə nəzarətin ələ keçirilə bilməməsi, PKK-nın hələ də müqavimət göstərməsi narahatlığı artırır. 

 

Cənub-Şərq vilayətlərində PKK-nın şiddətli müqavimət göstərməsi, əvvəlki illərdə olduğu kimi dağlarda deyil, şəhərlərdə möhkəmlənərək ordu ilə savaşması nə anlama gəlir? Hazırda Türkiyənin qonşularında qanlı müharibələrin, qeyri-sabit şəraitin davam etdiyi bir vaxtda bu hadisələr kənardan planlaşdırılmış və Ankaranı daxili proseslərlə məşğul etmək məqsədi güdmür ki?

 

Fransa Beynəlxalq Araşdırmalar Mərkəzi (CERI), Paris Siyasi Elmlər İnstitutunun eksperti Bayram Balçı Türkiyənin Cənub-Şərq vilayətlərindəki olayları musavat.com-a şərh edərkən deyir ki, hadisələrin bu şəkilə çatması PKK-nın öz gücünün qiymətləndirərək, iddialarını artırması ilə bağlıdır: “PKK gücünün fərqindədir. Hazırda bütün regional proseslər PKK-nın marağına cavab verir, Türkiyənin isə əksinə. Ona görə də PKK savaşı davam etdirir, ümid edir ki, sonunda muxtariyət və ya ona bənzər bir şəkildə haqlar ala biləcək. Xarici güclərin bu prosesdə iştirakına inanmıram, amma dünyanın qüdrətli dövlətlərində kürdlərə bir simpatiya var, PKK isə bunu yaxşı bilir. Eyni zamanda böyük dövlətlərin bölgədə İŞİD-ə qarşı kürdləri savaşdırdıqları üçün onlara dəstək verirlər”.

 

PKK-nın ruslar tərəfindən qızışdırılması kimi iddialar nə qədər həqiqətdir? Bayram Balçının fikrincə, Ankaranın bölgəyə daha böyük sayda ordu qüvvələri göndərməsi gərginliyi daha da artırır və əslində prosesləri dalana aprır: “Ora nə qədər çox ordu göndərsələr, Türkiyə üçün bir o qədər işin ziyanına olacaq. Türkiyə indi yaxşı durumda deyil, kürdlərə nəsə verməli olacaq. 

 

Ruslar kürdlərə simpatiya göstərirlər. İndiki mərhələdə Ankara nə etsə, bu onun ziyanına olacaq. Tarixdəki xətaların bu gün cəzası ödənir. Kürdlər bu tezliklə barış istəməyəcəklər, çünki savaş onlara daha çox şeylər gətirəcək. PKK bu günkü durumu tarixi fürsət kimi dəyərləndirir”.

 

B.Balçı deyir ki, indiki vəziyyətdə yenidən atəşkəsin əldə olunması üçün Ankaranın Öclanala danışqılar aparması mümkün görünsə də, durum daha ciddidir və düşmənçilik çox dərinləşdiyi üçün bunun da nəticə verəcəyi inandırıcı deyil. (musavat)