Anım Günündə transgenderin azyaşlıların önündə ifasına kim icazə verib? - AÇIQLAMA - VİDEO - YENİLƏNİB

"Ölkə.az" xəbər verir ki, görüntülər sosial şəbəkələrdə yayılıb və azyaşlıların önündə ifa edən transgender müğənninin iştirakı ictimaiyyətin narazılığına səbəb olub.

Mədəniyyət Evində bədii rəhbər Etibar Nurməmmədov bildirib ki, tədbirə transgenderin dəvət olunmasından xəbərsiz olublar:

"Onu dəvət edən işçi müdirə məlumat vermədiyi üçün işdən çıxarılıb. Biz həmin adamı içəri girəndən sonra gördük. Transgender olduğunu biləndə çıxışı yarımçıq saxlanılıb".

Məsələ ilə bağlı Mədəniyyət Evinin açıqlamasında bildirilib ki, müəssisə fəaliyyətini gələcək tədbirlərin hazırlanması və icrası zamanı yaradıcılığın və bədii zövqün inkişafı, eləcə də mədəni mühitin zənginləşdirilməsi istiqamətində davam etdirəcək.

Ətraflı Baku TV-nin süjetində:

***

Mirzə Ələkbər Sabir adına Bülbülə qəsəbə Mədəniyyət Evində Anım Günü münasibətilə təşkil olunan tədbirdə transgender ifaçının səhnə alması sosial şəbəkələrdə geniş müzakirələr doğurub.

Ölkə.Az xəbər verir ki, görüntülərdə ifaçının azyaşlıların qarşısında çıxış etməsi bir sıra insanlar tərəfindən tənqid olunub və narazılıqla qarşılanıb.

Məsələ ilə bağlı Milli.Az-ın Bülbülə qəsəbə Mədəniyyət Evinə sorğu ünvanlayıb.

Sorğuya cavab olaraq bildirilib ki, M.Ə.Sabir adına Bülbülə qəsəbə Mədəniyyət Evində illik İş Planına uyğun olaraq il ərzində müxtəlif mövzularda mədəni-kütləvi tədbirlər, ədəbi-bədii gecələr və konsert proqramları mütəmadi şəkildə təşkil olunur:

"Bu tədbirlər silsiləsində 27 Sentyabr - Anım Gününə həsr olunmuş konsert proqramı da keçirilib. Proqram çərçivəsində bir neçə sənət nümayəndəsinin çıxışları nəzərdə tutulub. 
Qeyd edirik ki, mədəniyyət müəssisələrində təşkil edilən tədbirlərə dəvət olunmuş ifaçılardan hər hansı birinin ifa tərzi və keyfiyyəti ilə əlaqədar sual yaranırsa, bu barədə mütəxəssislərin də rəyi nəzərə alınmaqla gələcəkdə fərqli repertuar və ifaçılara üstünlük verilməsi təmin olunacaq.

M.Ə.Sabir adına Bülbülə qəsəbə Mədəniyyət Evi bildirir ki, gələcək tədbirlərin hazırlanması və icrası zamanı  yaradıcılığın və bədii zövqün inkişafı, eləcə də mədəni mühitin zənginləşdirilməsi istiqamətində fəaliyyətini daha böyük əzmlə davam etdirəcək, bu sahədə maraqlı və zövq oxşayan proqramlar təşkil edəcək. Müəssisə bütün sakinləri və mədəniyyətsevərləri bu tədbirlərdə iştirak etməyə və təqdim olunan proqramlardan yararlanmaya dəvət edir".