Ramil Məmmədli: “Səudiyyə Ərəbistanı ilə İran illərdir bir-biri ilə hibrid müharibə aparır”
“Faktiki olaraq Səudiyyə Ərəbistanı ilə İran illərdir bir-biri ilə Yaxın Şərqdə - sərhədlərindən kənarda müharibə aparır. Sadəcə həm şiə liderin qətli, həm də Tehranda Səudiyyə Ərəbistanının səfirliyinin binasının yandırılması tərəflər arasında reallığı göz önünə çıxartdı”.
Bunu Ölkə.az-a açıqlamasında hərbi-siyasi icmalçı Ramil Məmmədli deyib.
Onun sözlərinə görə, illərdir Yaxın Şərqdə bu iki dövlət arasında hibrid müharibə gedir: “Onlar faktiki olaraq bir-biri ilə Suriyada, Livanda, Yəməndə və İraqda döyüşürlər. Qoşunları birbaşa üz-üzə gəlməsələr də tərəflər müharibə apardıqlarını yaxşı bilirlər. Məsələn, Yəməndə bu daha aydın görünür”.
R. Məmmədli bildirib ki, bütün bunlara baxmayaraq, Səudiyyə Krallığı bir şiə liderini öldürməklə posesin bu vəziyyət alacağını düşünməmişdi. Yaxudda, belə olacağına inanmırdılar.
Bəzi ərəb ölkələrinin Səudiyyə Krallığı ilə İrana qarşı müttəfiq olacağına dair verdikləri açıqlamalara da münasibət bildirən R. Məmmədlinin fikrincə, bu təbii haldır, amma bütün ərəb dünyasının Səudiyyə ilə birgə olacağı inandırıcı deyil:
“Bu bütün ərəb ölkələrini əhatə etməyəcək. Əlbəttə, bəllidir ki, Səudiyyə kral ailəsi digər ərəb ölkələrinin başçılarından zəngindir. Sirr deyil ki, Səudiyyə kralı adından həmin ərəb ölkələrinin başçılarına müxtəlif formalı mükafatlar verilir. Səudun varisləri pulla hakimiyyətləri ələ almağı öyrəniblər. Çünki onlar zəngindirlər. Yaxın Şərqdə belə şeylər çox olub. Amma açıq danışmaq lazımdır. İrana qarşı Suriya, Liviya və İraq radikal sünni rejimin yanında olmayacaq. Bu da təbiidir. Çünki həmin ölkələrdə şiə icması söz sahibidir”.
R. Məmmədli deyib ki, ABŞ-da Səudiyyə Ərəbistanı kral ailəsinin güclü lobbisi var. Başda prezident Barak Obama olmaqla Birləşmiş Ştatların Ər-Riyadı dəstəkləyəcəyi birmənalıdır. Lakin İranın da hərbi gücü və müttəfiqləri bəllidir: “Etiraf etməliyik ki, Səudiyyə kral hakimiyyəti zəngin olsa da İran qədər ciddi kökə söykənən dövlət deyillər. Yəni açıq müharibə olarsa, bu Səudiyyə üçün yaxşı heç nə vəd etməyəcək”.
R. Məmmədli onu da qeyd edib ki, Yaxın Şərqdə balansın pozulmasında ABŞ və İsrail qədər Səudiyyə Ərəbistanının da günahı var: “Səudiyyə Ərəbistanı da bu prosesin iştirakçısı olub. İsrail hərbi imkanları, Səudiyyə isə bundan yararlanaraq, ABŞ-dakı müttəfiqlərinin sayəsində digər ərəb ölkələrini özündən asılı vəziyyətə salıb. Bəzi məqamlarda cəza tədbiri həyata keçirib. Bu da qan və qırğınlarla müşayiət olunub”.
Ölkə.Az
