Lənkəranda gərginlik

Lənkəranın ucqar dağ kəndi olan Bəlitonda 3 il əvvəl başlanan torpaq sürüşməsində son aylarda aktivləşmə müşahidə olunur.

Ölkə.Az-ın ans press-ə istinadən məlumatına görə, ötən ilin oktyabr-noyabr aylarında yağan intensiv yağışlar vəziyyəti bir az da gərginləşdirib.

Evləri aktiv zonada yerləşən sakinlər qəzalı evlərdə yaşamağı təhlükəli sayırlar.

Zərərçəkən Şahin Ağayev deyir ki, mütəxəssislər gəlib baxış keçirəndən sonra bu qənaətə gəliblər ki, bu evdə yaşamaq qeyri-mümkündür:

“Söz veriblər ki, köməklik olunacaq, lakin köməklik hələ yoxdur”.

Digər zərərçəkən Vəliağa Ağayev evinin iki yerə bölündüyünü deyir. Oktyabr ayında yağan yağışdan sonra evinin qəzalı vəziyyətə düşdüyünü deyən V.Ağayev bütün aidiyyatı qurumları məlumatlandırdığını bildirir.

Lənkəran şəhər icra hakimiyyəti başçısının Bəliton ərazi vahidi üzrə nümayəndəsi Ağayar Yusubov bildirib ki, respublika FHN-in, Ekologiya və Təbii Sərvətlər Nazirliyinin mütəxəssislər qrupu ötən ilin oktyabrın 30-da 20 evə baxış keçirib və lazımi sənədləşmə işləri aparılıb. İndi həmin evlərin əsaslı bərpası və ya yenidən tikiləcəyi FHN-nin verəcəyi qərardan asılı olacaq.

Ölkə.Az