Ermənistana qarşı ərazi iddiasında deyilik, amma o torpaqlar bizi istəyir – Deputat
Ölkə.az xəbər verir ki, bunu deputat Sahib Alıyev parlamentdə çıxışı zamanı deyib.
Deputat bildirib ki, azadlıq müharibəsi təkcə torpaqlarımızın işğaldan azad edilməsi üçün aparılmayıb, Konstitusiyamızın təntənəsinə və suverenliyimizin təmininə yönəlib. Onun sözlərinə görə, ən çətin hissə məhz diplomatik müstəvidə, cəbhədəkindən qat-qat güclü rəqiblərlə aparılıb:
“Müzəffər Ali Baş Diplomatımızın qazandığı bu qələbə cəbhədəkinin davamı olsa da, əhəmiyyətinə görə onu kölgədə qoyduğunu təəssüf ki, hələ tam dərk edə bilmirik. Bəlkə də buna vaxt lazımdır. Dağın böyüklüyü ondan uzaqlaşdıqca daha aydın görünür. Ancaq çox istərdim ki, nəinki amnistiyaya düşənlər, onların doğmaları, yaxınları, ümumiyyətlə hər kəs bilsin: torpaqlarımız üzərində suverenliyimizin təmin edilməsi, bir daha vurğulayıram, müstəqilliyimizin elan edilməsindən də böyük uğurdur”.
Sahib Alıyev qeyd edib ki, Prezidentin dediyi azadlıq müharibəsi bizə necə yanaşmalarından asılı olmayaraq bütün qonşularımız, bütövlükdə isə Cənubi Qafqaz üçün də eyni mahiyyət daşıyır:
“Tarixdə ilk dəfədir ki, bu regionun geosiyasi subyekt kimi çıxış etmək şansı yaranıb. Ümid etmək istərdim ki, xudbinliyi, bəzən büruzə verilən alverçi yanaşmanı bir kənara qoyaraq bütün qonşularımız bunu düzgün dəyərləndirəcəklər. Qonşularımızdan söz düşmüşkən, sonda Ermənistan baş nazirinin imperiyanın oradakı və Qarabağdakı agentura şəbəkəsinin ötən əsrin sonunda başlatdığı Qarabağ hərəkatı ilə Qərbi Azərbaycan İcmasının fəaliyyətini eyniləşdirməsinə toxunmaq istərdim. Paşinyan bilməlidir ki, nə Azərbaycan dövləti, nə də Qərbi Azərbaycan İcması onun ölkəsinə qarşı ərazi iddiasındadır. Biz kimdənsə torpaq istəmirik, amma o torpaqlar bizi istəyir, bizi çəkir və biz ora gedəcəyik. Çünki Ermənistanın keçmiş rəhbəri Levon Ter-Petrosyandan fərqli olaraq, ora bizim yurd yerimizdir”.
Mürtəza
