"Bəşər Əsəd ya həbsxana künclərində öləcək, ya da öldürüləcək"

Rusiya prezidenti Putin Bəşər Əsədə siyasi sığınacaq verəcəyini deyib

Putin bildirib ki, 2017-ci ildə keçiriləcək seçkilərdə uduzacağı təqdirdə Edvard Snoudenə sığınacaq verdiyimiz kimi, Bəşər Əsədə də sığınacaq verə bilərik.

Putinin bu fikrinə politoloq Qabil Hüseynli Ölkə.Az-da münasibət bildirib:

"Suriya param-parçadır. Suriyanın harasında prezident seçkiləri keçiriləcək? 14 milyonluq Suriya əhalisinin 3 milyona yaxını Türkiyədədir, 1 milyondan çoxu Avropadadır, 1,5 milyondan çoxu isə İordaniyadadır. Belə bir ölkədə heç BMT-də razı olmaz ki, prezident seçkiləri keçirilsin. Əgər Suriyada ümummilli razılıq əldə edilərsə, o zaman prezident seçkiləri baş tuta bilər. O da ancaq Bəşər Əsədsiz.

Putinin dediklərinə gəldikdə isə, onsuz da sonda ya İran, ya da Rusiya Bəşər Əsədə siyasi sığınacaq vermək məcburiyyətində qalacaq. Hətta elə olsa belə, onun ömrünün uzun olmasına inanmıram. Bəşər Əsəd haqqında yəqin ki, məhkəmə qərarı olacaq. Bəşər Əsədin əli 350 mindən çox insanın qanına batıb. Belə bir adamı Miloşeviç kimi ya Haaqa məhkəməsinə verəcəklər, ya da tərs bir gülləyə qurban gedəcək. Bəşər Əsəd ya həbsxana künclərində öləcək, ya da öldürüləcək. Rusiyanın Suriyadakı siyasətinin axırı Rusiya üçün o qədər də uğurlu olmayacaq".

Qeyd edək ki, Sonuncu dəfə Suriyada prezident seçkiləri 2014-cü iyunun 3-də keçirilib. Paytaxt Dəməşqdə keçirilən bu seçkilərdə hazırki prezident Bəşər Əsəd qələbə çalıb.

Səxavət Məmməd
Ölkə.Az